һиндонезийә деңизида икки күндин бери йоқап кәткән кишиләрдин алтә нәпири тепилди
һиндонезийәниң аче өлкиси деңиз тәвәликидики банйак арилиға йетип бериш үчүн икки йағач тез сүрәтлик кемә билән йолға чиққан вә икки күндин бери йоқап кәткән йәттә кишидин алтиси қутқузувелинди.
түркийә авази радийоси хәвири: һиндонезийә йәрлик издәш-қутқузуш әтритиниң башлиқи йоқап кәткән төт нәпәр австиралийәлик вә икки нәпәр һиндонезийәликни тапқанлиқлирини, кемә хадимидин бирсиниң һазирғичә тепилмиғанлиқини билдүрди.
байанатта, һайат қалғанларниң давалиниши үчүн пинаң арилиға йөткәп келингәнлики билдүрүлди.
30 йашлиқ австиралийә пуқраси еллиот потениң қирғаққа йетип келәлигәнлики, башқа үч нәпәр австиралийәликниң болса, долқун тейилиш тахтисиға тайинип суда ләйләватқан һалда тепилғанлиқи уқтурулди.
қутқузувелинған икки нәпәр һиндонезийәликниң қандақ һайат қалғанлиқи һазирчә намәлум.
йоқап кәткән һиндонезийәликни издәш вә қутқузуш хизмәтлири давамлашмақта.
суматра арилиниң ғәрбигә тәхминән 150 километир келидиған нийас шәһиридин аче деңизидики банйак арилиға йетип бармақчи болған австиралийәлик сайаһәтчиләр вә һиндонезийәлик парахот хадимлиридин тәркиб тапқан 17 киши 13-авғустта икки йағач тез сүрәтлик кемә билән йолға чиққан болуп, бир кемидики австиралийәлик төт сайаһәтчи вә һиндонезийәлик үч парахот хадими начар һава райи сәвәбидин йоқап кәткән иди.
