ئەنگلىيە پارلامېنت ئەزاسى شىمالىي قىبرىسنىڭ ئېتىراپ قىلىنىشى كېرەكلىكىنى ئوتتۇرىغا قويدى

تۈركىيە ئاۋازى رادىيوسى خەۋىرى: ساممى ۋىلسون ئەنگلىيەدە چىقىدىغان سىياسەت ژۇرنىلى «Politshome» دا ماقالە ئېلان قىلىپ، «قىبرىس ئارىلى چېگراسىنىڭ ھەر ئىككى تەرىپىدە تولۇق خىزمەت قىلىۋاتقان ھۆكۈمەتلەر ۋە دېموكراتىك تۈزۈملەرنىڭ بارلىقى» نى،  بىرلەشكەن دۆلەتلەر تەشكىلاتى (ب د ت) نىڭ شىمالىي قىبرىس تۈرك جۇمھۇرىيىتىنى ئېتىراپ قىلماسلىقىنىڭ ھېچقانداق سەۋەبى يوقلۇقىنى تەكىتلىدى.

ئەنگلىيە پارلامېنت ئەزاسى ۋىلسون شىمالىي ئىرېلاندىيە تىنچلىق مۇساپىسىدە ئىمزالانغان، «خەيرىلىك جۈمە كېلىشىمى» دەپمۇ ئاتىلىدىغان بېلفاست كېلىشىمىگە ئىشارەت قىلىپ: «خەلقئارا ئەدلىيە سوتىنىڭ 2010- يىلىدىكى كوسوۋۇنىڭ مۇستەقىللىقى توغرىسىدىكى قارارى، شىمالىي قىبرىس تۈرك جۇمھۇرىيىتىنىڭ تەلىپىنى تېخىمۇ كۆپ قانۇنىيلىق بىلەن تەمىنلىشى كېرەك» دېگەنلەرنى قەيت قىلدى.

قىبرىس مەسىلىسىنى ھەل قىلىشقا مۇناسىۋەتلىك تەكلىپ – لايىھەلەرنى قىبرىسلىق رۇملارنىڭ رەت قىلغانلىقىنى تىلغا ئالغان ۋىلسون، ئەنگلىيەنىڭ بۇ مۇساپىدە قىبرىس تۈركلىرى بىلەن رۇملارغا مۇرەسسەچى بولۇشىنى تەلەپ قىلدى.