голландийәдә һөкүмәт истипа бәрди
голландийә баш министири марк рутте төт партийәдин тәркип тапқан бирләшмә һөкүмәтниң көчмәнләр сийасити тоғрисидики музакиридә келишим һасил қилалмиғандин кейин истипа бәргәнликини елан қилди.
түркийә авази радйоси хәвири: марк рутте бирләшмә һөкүмәттики төт партийә оттурисида көчмәнләр сийаситиниң чиңитилишиға даир музакириләрдин кейин мухбирларни күтүвелиш йиғини өткүзди.
марк рутте көчмәнләр мәсилисиниң бир чоң иҗтимаий мәсилә икәнликини тилға елип, «бирләшмә һөкүмәттики сийаси қоллаш ғайиб болди. бу қайғулуқ бир әһвал вә биз сәл қарашқа болмайдиған сийасий бир реаллиқтур. мән кабинетниң истипанамисини падишаһқа (виллем александерға) сунимән» деди.
марк рутте дәсләптә сайламниң йеңилиниш мусаписини башлайдиғанлиқини билдүрүп, һазирқи һөкүмәтниң сайламғичә «вақитлиқ» вәзипә өтәйдиғанлиқини уқтурди.
һөкүмәтниң истипа беришиниң һәргизму йахши иш әмәсликини, бу җәрйанни тамамлийалмиғанлиқи үчүн азаблиниватқанлиқини әскәрткән марк рутте, көчмәнләр сийаситигә қарита бирдин көп чүшинишмәсликләр барлиқини, көчмәнләр сийаситиниң кишиләр үчүн муһимлиқини тилға алди.
өктичиләрдин нурғунлиған парламент әзалири тивиттерда өзгиришләргә қарита һәмбәһирлигән учурлири арқилиқ һөкүмәтниң истипа қараридин мәмнун болғанлиқлирини билдүрүп, сайламниң балдуррақ өткүзүлүшини тәләп қилди.
