ши җинпиң: һәрқайси дөләтләр бир – бирини рәқиб әмәс, шерик дәп билиши керәк
хитай дөләт рәиси ши җинпиң һәрқайси дөләтләрниң бир – бирини рәқиб әмәс, шерик, тәһдит әмәс, пурсәт дәп билиши керәкликини ейтти.
түркийә авази радийоси хәвири: хитай ташқи ишлар министирлиқиниң байанатиға қариғанда, ши җинпиң пайтәхт бейҗиңда йеңи зеландийә баш министири крис һипкинс билән көрүшкән.
учришишта, ши җинпиң йил бешида вәзипигә олтурған меһман баш министир крис һипкинсниң хитай – йеңи зеландийә мунасивәтлиригә әһмийәт бериши һәм һәмкарлиқини күчәйтишниң зөрүрлүкини тәкитлишигә йуқири баһа беридиғанлиқлирини әскәрткән.
ши җинпиң өзиниң 2014-йили йеңи зеландийәгә қилған зийарити җәрйанида икки дөләт оттурисида «кәң даирилик истратегийәлик һәмкарлиқ мунасивити» орнитишниң қарарлаштурулғанлиқини, шуниңдин кейинки 10 йил ичидә икки дөләт мунасивәтлириниң сағлам вә муқим һаләтә тәрәққий қилғанлиқини тәкитләп мундақ дегән: «биз бир - биримизни рәқиб әмәс, әксичә шерик, тәһдит әмәс, бәлки пурсәт дәп билишни давамлаштурушимиз керәк.»
у хитай билән йеңи зеландийәниң әркин сода келишими вә кәң даирилик районлуқ иқтисадий һәмкарлиқ келишимигә асасән һәмкарлиқни йеңилап, техиму тәрәққий қилдуруши, сода вә мәбләғ селишни техиму әркинләштүрүшни алдинқи нишан қилиши керәкликини тәкитлиди.
йеңи зеландийә баш министири крис һипкинс хитай – йеңи зеландийә мунасивәтлиригә икки дөләт оттурисидики охшимаслиқларға қарап ениқлима берилишини халимайдиғанлиқлирини, охшимаслиқларни өзара һөрмәт қилиш, чүшиниш, сәмимий алақә вә өзара тәсир көрситиш арқилиқ маслаштурушни нишан қиливатқанлиқлирини әскәртти.
