ши җинпиң бил гейтисни қобул қилди
хитай дөләт рәиси ши җинпиң пайтәхт бейҗиңни зийарәт қилған микрософт техника ширкитиниң қурғучиси америкалиқ содигәр бил гейтисни қобул қилди.
түркийә авази радийоси хәвири: хитай ташқи ишлар министирлиқи байанатчиси хуа чүнйиңниң тивиттердики адресида елан қилған байанатиға қариғанда, ши җинпиң көрүшүш җәрйанида бил гейтисни бу йил (2023) бейҗиңда көрүшкән «тунҗи америкалиқ дост» дәп атиған.
ши җинпиң хитай - америка мунасивитиниң асасиниң хәлқләр икәнликини тилға елип: «биз америка хәлқигә ишинимиз, биз икки дөләт хәлқи оттурисидики достлуқниң мәңгүлүк болушини үмид қилимиз» дегән.
гейтис түнүгүн дунйави сәһийә вә тәрәққийат саһәси бойичә хизмәт қилидиған бил вә мелинда гейтис фондиға вакалитән сөһбәт өткүзүш үчүн хитайға барғаниди.
бейҗиңдики йәр шари сағламлиқ дора байқаш институтида сөз қилған гейтис, ачарчилиқ, килимат өзгириши, ковид – 19 ға охшаш йуқумлуқ кесәлликләрниң қайтидин баш көтүрүшидәк дунйави мәсилиләрни һәл қилишта һәмкарлиқниң шәрт икәнликини тәкитлигәниди.
гейтисниң зийарити вә униң ши җинпиң билән көрүшүши, америка ташқи ишлар министири антони блинкенниң мушу һәптиниң ахирида әмәлгә ашуруши пилан қилинған бейҗиң зийаритидин илгирики вақитқа тоғра келиши диққәтни тартти.
блинкенниң ши җинпиң вә башқа әмәлдарлар билән көрүшүп, йеқинқи мәзгилләрдә йириклишип қалған икки дөләт мунасивитидики мәсилиләрни музакирә қилидиғанлиқи билдүрүлгәниди.
