путин әлийев вә пашинйан билән көрүшти
русийә пирезиденти владимир путин әзәрбәйҗан пирезиденти илһам әлийев вә әрменийә баш министири никол пашинйан билән пайтәхт москвада бир йәргә җәм болди.
түркийә авази радийоси хәвири: путин кремил сарийида өткүзүлгән әзәрбәйҗан – әрменийә мунасивәтлири йиғини һарписида, әзәрбәйҗан пирезиденти илһам әлийев вә әрменийә баш министири никол пашинйан билән айрим - айрим көрүшти.
пирезидент путин учришиштин кейин, үч рәһбәр бир йәргә җәм болған йиғинда ечилиш нутуқи сөзлиди.
у тәклипкә бинаән йиғинға қатнашқан рәһбәрләргә миннәтдарлиқ билдүрүп мундақ деди: «бу йиғинниң биз узундин буйан тәкитләп келиватқан бәзи мәсилиләрниң һәл қилинишида түрткилик рол ойнишиға тиләкдашмән.»
бу форматсийәдә чақирилған йиғинларда нурғун нәтиҗиләрни қолға кәлтүргәнликлирини қәйт қилған путин, тоқунушларниң 2020-йили ахирлашқанлиқини, иқтисадий вә қатнаш алақисини ишқа кириштүрүш, чегра линийәлирини бәлгиләш хизмитиниң башланғанлиқини әскәртип мундақ деди: «бәзи қийинчилиқ вә сақлиниватқан мәсилиләргә қаримай, омумий мәсилиләрни һәл қилиш йолида муһим хизмәтләр ишлиниватиду. бу хизмәтләрдин бири қатнаш алақисини ишқа кириштүрүш хизмити һесаблиниду. әмма, техникилиқ җәһәттин техичә һәл қилиналмиған мәсилиләрму бар.»
русийә, әзәрбәйҗан вә әрменийәниң муавин баш министирлириниң бир һәптидин кейин бу мәсилиләрни музакирә қилиш, һәмдә һәл қилиш үчүн бир йәргә җәм болушини тәвсийә қилған путин, келәр һәптә өткүзүлидиған йиғин үчүн әлийеввә пашинйан биләнму бирдәклик һасил қилди.
у бу һәқтә мундақ деди: «бу техи һәл қилиналмиған мәсилиләрниң һәл болуши йолида үмид чириғи йандурған бир келишим болди.»
үч тәрәп йиғини уда 20 минут давамлашти.
