исраилийәдики әрәб шәһәрлиридә омумйүзлүк иш ташлаш намайиши өткүзүлиду

түркийә авази радийоси хәвири: исраилийә пуқраси болған пәләстинликләргә вәкиллик қилидиған әрәб алий көзитиш комитети бу вәқәдин кейин җиддий йиғин чақирди.

бу комитет тәрипидин елан қилиған йазма байанатта, пәләстинлик дохтур муһәммәд әласибиниң исраилийә сақчилири тәрипидин етип өлтүрүлүшигә наразилиқ билдүрүш үчүн исраилийәдики барлиқ әрәб йәрлик һөкүмәтлири вә маарип системисиниму өз ичигә алидиған шәкилдә омумйүзлүк иш ташлаш намайиши өткүзүлидиғанлиқи билдүрүлди.

бу қетимқи иш ташлашқа алаһидә маарип системисиниң қатнашмайдиғанлиқи билдүрүлгән байанатта, «бүгүндин башлап һәрқайси әрәб районлири вә йеза - кәнтлиридә намайишлар өткүзүлиду» вә «асибиниң исраилийә сақчилири тәрипидин етип өлтүрүлүшини тәкшүрүш үчүн мәхсус тәкшүрүш комитети қуруш қарар қилинди» дейилди.

мәзкур комитет «асибиниң һурра районида өткүзүлидиған дәпнә мурасимини исраилийәниң ишғал қилиш, бастуруш вә ирқий кәмситиш сийасәтлиригә қарши аммиви намайишқа айландуруш» тоғрулуқ чақириқта болди.

исираилийә күчлири алдинқи күни шәрқий қуддусниң қәдимий шәһәр районида мәсҗиди әқсаға тутишидиған йипәк йоли дәрвазисида кимлик тәкшүрүш елип бериватқан сақчилардин бириниң қоралини елишқа урунғанлиқини илгири сүрүп асибини етип өлтүргән иди.

исраилийә сақчилири  аммиви ортақлишиш тор бети Twitter сәһиписидә елан қилған байанатида, асибиниң «бир сақчиниң қоралини тартивелип, сақчиларға икки пай оқ атқанлиқи» ни вә һайати хәвп ичидә қалған сақчиларниң бу кишини бир тәрәп қилғанлиқини илгири сүргәниди.

райондики барлиқ бихәтәрлик камералириниң тәкшүрүлгәнлики тәкитләнгән байанатта, бу вәқәниң камераға әкс әтмигәнлики илгири сүрүлгән иди.

өлтүрүлгән пәләстинлик йаш дохтурниң аилә тавабианлири исраилийә илгири сүргән «өлтүрүлгүчиниң сақчиларниң белидин қоралини тартивелишқа урунғанлиқи» ға даир дәваларни рәт қилған вә әгәр бу әйибләшләр раст болса, бихәтәрлик камералириниң көрүнүшлириниң елан қилинишини тәләп қилғаниди.