америка ковид-19 ниң келип чиқиш мәнбәсигә даир учурларни ашкарилаш қанунини мақуллиди

түркийә авази радийоси хәвири: америка авам палатаси америка дөләтлик истихбарат идариси (DNI) директориниң ковид -19 вирусиниң келип чиқишиға мунасивәтлик истихбарат учурлирини амма билән ортақлишишни мәзмун қилған қанун лайиһәсигә беләт ташлиди؛ қанун лайиһәси барлиқ палата әзалириниң қоллап беләт ташлиши нәтиҗисидә мақулланди.

ковид -19 вируси вухән вирус институтидин чиққан болуши мумкин дәп қарашниң асаси барлиқи оттуриға қойулған қанун лайиһәсидә, DNI ковид -19 ниң келип чиқиши тоғрисидики учурларни амма билән ортақлишишқа чақирилди.

лайиһәдә йәнә, вухән институтидики тәтқиқатчиларға мунасивәтлик учурларниңму елан қилиниши тәләп қилинди.

«вал кочиси гезити», америка енергийә министирлиқиниң йеқинда ақсарай вә палатаниң муһим әзалириға сунған мәхпий истихбарат доклатиға асаслинип, ковид -19 ниң хитайдики тәҗрибиханидин еһтийатсизлиқтин еқип чиқип кәткән болушниң күчлүк еһтималлиқ икәнликини илгири сүргәниди.

америка дөләт бихәтәрлик мәслиһәтчиси җәйк сулливан истихбарат саһәсидә бу мәсилидә охшимиған көз қарашларниң барлиқини, әмма җәзмләштүрүлгән йетәрлик учур йоқлуқини ейтти.

федератсийә тәкшүрүш идариси башлиқи кристофир врай өзлириниң ковид -19 ниң «хитайдики тәҗрибиханидин еһтийатсизлиқтин еқип кәткән болуши күчлүк еһтималлиқ» дәп қарайдиғанлиқини билдүргәниди.