پۇتىن يېڭى ئىستراتېگىيەلىك قوراللارنى قىسقارتىش شەرتنامىسىگە قاتنىشىشنى توختىتىش قانۇنىنى ئىمزالىدى

تۈركىيە ئاۋازى رادىيوسى خەۋىرى: رۇسىيە پىرېزىدېنتى ۋلادىمىر پۇتىن دۆلىتىنىڭ ئامېرىكا بىلەن قىتئەلەر ئارا يادرو باللىستىك باشقۇرۇلىدىغان بومبا ئىقتىدارىنى تىزگىنلەش توغرىسىدا تۈزگەن «يېڭى ئىستراتېگىيەلىك قوراللارنى قىسقارتىش شەرتنامىسى (START)»غا قاتنىشىشىنى ۋاقتىنچە توختىتىشنى مەزمۇن قىلغان قانۇننى ئىمزالىدى.

رۇسىيە دۆلەتلىك قانۇن ئۇچۇرلىرى سىستېمىسىدا ئېلان قىلىنغان مەزكۇر قانۇنغا ئاساسەن، رۇسىيە بىلەن ئامېرىكا ئوتتۇرىسىدىكى توڭلىتىپ قويۇلغان «يېڭى ئىستراتېگىيەلىك قوراللارنى قىسقارتىش شەرتنامىسى»گە قايتا قوشۇلۇش مەسىلىسىگە رۇسىيە پىرېزىدېنتى قارار قىلىدىكەن.

ۋلادىمىر پۇتىن 21-فېۋرال (2023) فېدېراتسىيە پارلامېنتىدا قىلغان سۆزىدە، رۇسىيەنىڭ ئامېرىكا بىلەن يېڭى ئىستراتېگىيەلىك قوراللارنى قىسقارتىش شەرتنامىسىگە قاتنىشىشىنى ۋاقتىنچە توختاتقانلىقىنى ئېلان قىلغانىدى.

رۇسىيە پارلامېنتىنىڭ تۆۋەن قانىتى بولغان دۆلەت دۇماسىمۇ 22-فېۋرال بۇ شەرتنامىنى ۋاقتىنچە توختىتىشنى مەزمۇن قىلغان قانۇننى ماقۇللىغانىدى.

ئامېرىكا قوشما ئىشتاتلىرىنىڭ 1991-يىلى سابىق سوۋېت ئىتتىپاقى بىلەن، 1993-يىلى رۇسىيە فېدېراتسىيەسى بىلەن ئىمزالىغان ئىستراتېگىيەلىك قوراللارنى قىسقارتىش شەرتنامىلىرى (START 1 ve START 2) نىڭ داۋامى بولغان «يېڭى ئىستراتېگىيەلىك قوراللارنى قىسقارتىش شەرتنامىسى» كېلىشىمى، ۋاشىنگتون بىلەن موسكۋا ئوتتۇرىسىدىكى ئىجرا قىلىنىۋاتقان ئەڭ ئاخىرقى يادرو كېلىشىمى بولۇش ئالاھىدىلىكىگە ئىگە.

بۇ شەرتنامە ئۇزۇن مۇساپىلىق يادرو ئوق بېشى ۋە باشقۇرۇلىدىغان بومبىلارغا چەكلىمە قويىدۇ.

2011-يىلى 5-فېۋرالدىن باشلاپ ئىجرا قىلىنىۋاتقان 10 يىللىق كېلىشىمنىڭ مۇددىتى 2021-يىلى 2-ئاينىڭ 5-كۈنى توشاتتى.

رۇسىيە پىرېزىدېنتى پۇتىن 2021-يىلى 29-يانۋار شەرتنامىنى 5 يىل ئۇزارتىشنى مەزمۇن قىلغان قارارنى ئىمزالىغان. 2021-يىلى 5-فېۋرال ئامېرىكا ھۆكۈمىتىمۇ كېلىشىمنى ئۇزارتىشنى قارار قىلغانلىقىنى ئېلان قىلغانىدى.