орбан: шиветсийә түркийәниң әндишилирини ойлишиши керәк

түркийә авази радийоси хәвири: венгирийә баш министири виктор орбан венгирийә дөләтлик «косут радийоси» ға бәргән байанатида, шиветсийә билән финландийәниң шималий атлантик әһди тәшкилатиға әза болушини шәхсий җәһәттин қоллайдиғанлиқини ейтти.

орбан өзиниң рәһбәрликидики венгирийә йуртдашлар бирлики партийәсиниң бәзи парламент әзалириниң венгирийә һәққидә йалған хәвәрләрни тарқатқанлиқи сәвәбидин, шиветсийә билән финландийәниң шималий атлантик әһди тәшкилатиға әза болушини қоллашни халимайдиғанлиқини қәйт қилди.

виктор орбан мундақ деди: «әгәр шиветсийә билән финландийә шималий атлантик әһди тәшкилатиға әза болуш басқучиға венгирийәниң төһпә қошушини халиса, бу икки дөләт венгирийә һәққидә йалған хәвәрләрни тарқатмаслиқи керәк.»

орбан түркийәниң шиветсийә һәққидә әндишәлириниң барлиқини, шуңа шиветсийәниң түркийәниң бу әндишәлирини ойлишиши керәкликини тәкитләп мундақ деди: «түркийәниң әндишәлири  шиветсийәдики түркийәгә қарши һәрикәт қиливатқан террорлуқ тәшкилатлириниң мәвҗудийитидур. дәрвәқә, түркийә бизниң иттипақдишимиздур. шуңа, түркийәниң авазини аңлишимиз керәк.»

венгирийә баш министири виктор орбан уда бир йилдин буйан үзлүксиз давамлишиватқан русийә – украина урушида һечқайси тәрәпниң нәпкә еришәлмигәнликини, шу вәҗидин, алди билән дәрһал уруш тохтитиш, андин тинчлиқ сөһбити өткүзүшкә еһтийаҗ барлиқини әскәртип мундақ деди: «русийә бу урушта ғәлибә қилалмайду, чүнки ғәрб украина үчүн шунчә көп қорал - йарағ, енергийә вә пул топлаватиду. урушниң нәтиҗилири буниң дәл әксичә болушиму мумкин. йадро дөлити болған русийәни мәғлуб болиду, дәп қарайдиғанлар хаталишиватқан болушиму мумкин.»