конакович апәт районида көргәнлири тоғрисида тохталди

түркийә авази радийоси хәвири: боснийә-гертсеговина ташқи ишлар министири конакович түркийә вә германийә зийарәтлиридин кейин пайтәхт сарайевуда мухбирларни күтүвелиш йиғини өткүзүп, учришишлири тоғрисида мәлумат бәрди.

6 – феврал (2023) қаһраманмарашни мәркәз қилип йүз бәргән «әсирниң апити» дәп аталған йәр тәврәшләрдин кейин, өткән һәптә түркийәгә келип пайтәхт әнқәрә вә һатайда зийарәттә болған конакович, издәш – қутқузуш хизмәтлиригә иштирак қиливатқан боснийә - гертсеговина әтритигә рәһмәт ейтқаниди.

у өзиниң йәр тәврәш районида наһайити азаблиқ көрүнүшләргә йолуққанлиқини билдүрүп: «мән инсан әқли тәсвирлигүсиз алаһидә һессийатлар билән қайтип кәлдим. бу арқа көрүнүштә, бу йәрдин барған әтрәтләр һәқиқәтән кишиниң ишәнгүси кәлмәйдиған хизмәтләрни қилди» деди.

боснийә-гертсеговинаниң издәш вә қутқузуш хизмитидә әң актип дөләтләрниң бири икәнликигә ишарәт қилған конакович: «биз сан җәһәттиму алдинқи орунда турдуқ, йардәм әтрәтлиримиздин пәхирлинимиз» дегәнләрни қәйт қилди.

боснийә – гертсеговинаниң 234 адәмдин тәркиб тапқан 13 әтритиниң йәр тәврәшниң биринчи күнидин башлапла издәш - қутқузуш хизмитигә қатнишип, 26 адәмни харабиликтин қутулдуруп чиққанлиқи билдүрүлгәниди.