әнглийә-украина оттурисида «лондон хитабнамәси» имзаланди

түркийә авази радийоси хәвири: әнглийә билән украина оттурисида икки дөләт мунасивәтлирини күчәйтишни мәқсәт қилған «лондон хитабнамәси», пайтәхт лондонға йетип кәлгән украина пирезиденти володимир зеленский вә әнглийә баш вәзири риши сунак тәрипидин имзаланди.

хитабнамәдә, русийәниң украинаға қарши 2014- вә 2022-йиллиридики таҗавузчилиқлири үчүн «йавропаниң хәвпсизлики вә кишиләрниң өз келәчикини йаритиш һоқуқиға һуҗум қиливатиду. әркинликимизгә тәһдит селиватиду» дейилди.

русийәгә қарши әнглийә билән украинаниң зич иттипақлишидиғанлиқи тәкитләнгән хитабнамәдә, лондонниң кийевниң мустәқиллиқи, земин пүтүнлүки вә чеграсини қәтий тәврәнмәй қоллайдиғанлиқи оттуриға қойулди.

хитабнамәдә, украинаниң өзиниң бихәтәрликни, җүмлидин шималий атлантик әһди тәшкилати-натоға әза болушини қоллайдиғанлиқи тәкитләнди вә мунулар дейилди:

«украина қораллиқ қисимлири өзиниң земининила әмәс, бәлки бизниң ортақ қиммәт қаришимизни вә хәлқара қанунниң асасий пиринсиплирини тәшкил қилидиған б д т низамнамәсиниму қоғдимақта. дөләтлиримиз русийәниң <тәсир даириси> тәшәббусини вә чеграни зорлуқ билән өзгәртиш қәдәмлирини рәт қилиду. биз игилик һоқуқи вә өз тәқдирини өзи бәлгиләштәк қиммәт қаришини қоғдаймиз. биз русийә садир қилған вәһшийликниң қайта йүз бәрмәсликигә капаләтлик қилиш ирадисигә игә.»

хитабнамәдә, украинани һәрбий җәһәттин қоллашниң давам қилидиғанлиқи вә әнгилийәниң русийәгә қаратқан ембарго йүргүзүшни давамлаштуридиғанлиқи тәкитләнди.

хитабнамәдә, «украинаниң игилик һоқуқини капаләткә игә қилмай туруп, йавропаниң бихәтәрликини капаләткә игә қилғили болмайду» дейилди вә әнглийәниң зеленский оттуриға қойған тинчлиқ пиланиниму қарши алидиғанлиқи қәйт қилинди.

хитабнамәдә, 21-22-ийун күнлири лондонда украинаниң қайтидин қурулуши мәсилиси музакирә қилинидиған конферансниң өткүзүлидиғанлиқи әскәртилди.