kiristérson: ighwagerchiler shiwétsiyening natogha kirishige tosqunluq qilmaqchi boluwatidu

türkiye awazi radiyosi xewiri: shiwétsiye bash ministiri ulf kiristérson paytext stokholmda tashqi ishlar ministiri tobiyas bilstrom we dölet mudapie ministiri pal jonson bilen birleshme axbarat élan qildi.

kiristérson shiwétsiyening ikkinchi dunya urushidin kéyin (1945-1939) eng éghir bixeterlik mesilisige duch kelgenlikini bildürüp: «beziler shiwétsiyening shimaliy atlantik ehdi teshkilatigha kirishining qanchilik muhim ish ikenlikini chüshenmeydu. ighwagerchiler shiwétsiyening shimaliy atlantik ehdi teshkilatigha kirishige tosqunluq qilmaqchi boluwatidu. türkiye bilen qaytidin diyalogqa qaytishni xalaymiz. türkiye özining qararini özi béridu, biz buninggha hörmet qilishimiz kérek, nöwettiki weziyetni yumshitishni xalaymiz» dédi.

tashqi ishlar ministiri bilstrom bolsa, shenbe küni (21-yanwar) daniyelik ashqun ongchi qattiq yönilish partiyesining rehbiri rasmus paludanning stokholmdiki türkiye elchixanisi aldida quranni köydürüsh ighwagerchiliki üstide toxtilip: «kitablarning köydürülüshining intayin qarangghu bir tarixi bar. buni bildürüsh türkiyege xushamet qilish emes. türkiyede shundaqla afghanistan we pakistan qatarliq namayish ötküzülüwatqan bashqa döletlerde qattiq naraziliqlar bar. ijtimaiy taratqularda shiwétsiye mallirini bayqut qilishni xalaydighan awazlar yükselmekte. hökümet ehwalni yéqindin közitiwatidu» dédi.

shiwétsiye dölet mudapie ministiri pal jonsonmu shiwétsiyening shimaliy atlantik ehdi teshkilatigha eza bolush tirishchanliqining dawamlishidighanliqini we buning dölitining bixeterlikige nurghun paydiliq amillarni qoshidighanliqini éytti.