йавропа иттипақи иранға қошумчә җаза йүргүзүшни қарар қилди

түркийә авази радийоси хәвири: йавропа иттипақиға әза дөләтләр, маһса әмини исимлик иранлиқ бир қизниң сентәбирдә назарәт астидики мәзгилидә өлүп кетишидин кейин башланған намайишларни бастурушта рол  ойниған 18 иранлиқ билән 19 иран ширкитигә җаза йүргүзүшни қарар қилди.

җаза йүргүзүлидиған кишиләрниң ичидә иран йашлар вә тәнтәрбийә министири сәййид һамид һазавәһ сәҗҗади, бир қисим парламент әзалири, бәзи вилайәтләрниң валийлири, дөләт медийаси хизмәтчилири вә иран инқилаб  муһапизәтчилири қисимлириниң бир қисим йуқири дәриҗилик әмәлдарлири бар икән.

тизимликтә йәнә, иран инқилаб  муһапизәтчилириниң дөләтниң бәзи җайлиридики қисимлири билән иран алаһидә сақчи әтрити вә иранни бихәтәрлик мулазимити билән тәминләйдиған бәзи ширкәтләрму бар икән.

бу қетимқисини қошқанда, йавропа иттипақиниң җаза тизимликигә киргүзүлгән иранлиқлар омумий сани 164кә, органлар сани 31 гә йәткән болуп, җазалар йавропа иттипақи дөләтлиригә сайаһәткә бериш чәклимиси, мал – мүлүкни тоңлитиш һәмдә мәзкур шәхс вә ширкәтләрни мәбләғ билән тәминләш қатарлиқларни өз ичигә алидикән.

буниңдин башқа, иранға аммиға бесим қилишта ишлитишкә болидиған бәзи материйаллар вә из қоғлаш үскүнилирини сетишму мәни қилинидикән.