ким җоңун қитәләр ара йеңи бир баллистик башқурулидиған бомба тәрәққий қилдуридиғанлиқини ейтти
шималий корейә рәһбири ким җоңун йеңи йилда дөлитиниң йадролуқ қорал-йарағ амбириниң иқтидарини тез сүрәттә ашуруп, йеңи бир қитәләр ара баллистик башқурулидиған бомба тәрәққий қилдуруш керәкликини ейтти.
түркийә авази радийоси хәвири: ким җоңун бу учурини һакимийәт бешидики ишчилар партийәсиниң пйоңйаңниң йеңи йиллиқ асаслиқ сийасәт йөнилишини бекитиш үчүн чақирилған омумий йиғиниға йоллиди.
ким җоңун җәнубий корейә очуқ дүшмәнгә айланған әһвалда тактикилиқ йадро қораллирини түркүмләп ишләпчиқиришниң муһимлиқи вә зөрүрлүкини тәкитләп, дөләтниң йадро қорал амбирини һәссиләп ашуруш чақириқида болди.
у йәнә дөлитиниң һәрбий иқтидарини қәтийлик билән күчәйтиш мәқситидә йеңи бир қитәләр ара баллистик башқурулидиған бомбини тәрәққий қилдуруш вә җасуслуқ сүний һәмраһини балдуррақ орбитиға қойуп бериш керәкликини тәкитлиди.
шималий корейә 2022 - йили илгирики йиллардикигә селиштурғанда техиму көп башқурулидиған бомба қойуп берип, корейә йерим арили вә шәрқий асийада җиддийчиликни күчәйтивәткән иди.
пйоңйаң һөкүмити шәрқ вә ғәрб тәрәпкә һәр хил типтики вә һәр хил мусапилиқ 90 дин артуқ башқурулидиған бомба қойуп бәргән болуп, нойабирниң бешида бир күндила 23 башқурулидиған бомба атқан иди.
шималий корейә йәнә 2023 - йилиниң дәсләпки саәтлиридиму баллистик башқурулидиған бомба синақ қилди.
җәнубий корейә армийә баш иштаб башлиқи шу йәрниң вақти әтигән саәт 2 дин 50 минут өткәндә шималий корейәниң рйоңсоң районидин қисқа мусапилик баллистик башқурулидиған бомба қойуп бәргәнликини билдүрди.
