ислам һәмкарлиқ тәшкилати: хитай – әрәб әллири йиғинидин хурсәнмиз
ислам һәмкарлиқ тәшкилати сәуди әрәбистанниң пайтәхти рийадта чақирилған «хитай – әрәб әллири башлиқлар йиғини» ниң нәтиҗилиридин хурсән икәнликини билдүрди.
түркийә авази радийоси хәвири: ислам һәмкарлиқ тәшкилатиниң билдүрүшичә, ислам һәмкарлиқ тәшкилати баш катипи һүсәйин ибраһим таһа, башлиқлар йиғини нәтиҗилириниң әрәб әллири – хитай достлуқиниң ортақ мәнпәәтлиригә хизмәт қилидиғанлиқини, һәмдә әрәб дөләтлири билән хитай оттурисидики һәмкарлиқ вә иттипақдашлиқни йеңи һәрикәтләндүргүч күчкә ериштүридиғанлиқини ейтқан.
башлиқлар йиғининиң нәтиҗилиридин хурсән икәнликини әскәрткән таһа, сәуди әрәбистанниң башлиқлар йиғининиң өткүзүлүши үчүн ойниған башламчилиқ ролини махтиған.
байанатта тәкитлинишичә, баш катип таһа, сәуди әрәбистан ташқи ишлар вәзири фәйсәл бин фәрһанниң тәклипигә бинаән йиғинға қатнашқан.
түнүгүн, сәуди әрәбистанниң пайтәхти рийадта, хитай дөләт рәиси ши җинпиңдин сирт йәнә, әрәб дөләтлири рәһбәрлириниң иштирак қилишида «хитай – әрәб дөләтлири башлиқлар йиғини» өткүзүлгәниди.
йиғиндин кейин елан қилинған «рийад байаннамиси» дә әскәртилишичә, башлиқлар йиғинида, хитайниң «бир бәлвағ бир йол» тәшәббусини қоллаш, тәрәпләр оттурисидики һәмкарлиқни күчәйтиш вә келәр қетимлиқ башлиқлар йиғинини хитайниң пайтәхти бейҗиңда өткүзүш қарар қилинған.
буниңдин башқа йәнә, пәләстин мәсилисиниң оттура шәрқниң асаслиқ мәсилиси икәнлики вә бу мәсилигә икки дөләтлик түзүм әндизисигә асасән адил вә үзүл - кесил һәл қилиш чариси тепишниң зөрүрлүки, сүрийә, ливийә вә йәмәндики кризисларни һәл қилиш үчүн хәлқаралиқ вә районлуқ сәвийәдә ортақ һәрикәт қилишниң муһимлиқи тәкитләнгән.
