путин, әлийев вә пашинйан үч тәрәп учришиши өткүзди

түркийә авази радийоси хәвири: русийә пирезиденти виладимир путин, әзәрбәйҗан пирезиденти илһам әлийев вә әрменийә баш министири никол пашинйан сочида көрүшүп, әзәрбәйҗан билән әрменийә оттурисидики тинчлиқ келишиминиң асасини тәшкил қилидиған һөҗҗәткә имза қойуш мәсилисини музакирә қилди.

путин, учришишниң наһайити үнүмлүк болғанлиқини, униң кәлгүси келишимләр үчүн пайдилиқ муһит йаритип бәргәнликини тилға алғандин кейин, «растини ейтқанда, биз һәммини мақуллимидуқ, мутәхәссисләр тәрипидин оттуриға қойулған дәсләпки лайиһәдики бәзи нәрсиләрни чиқириветишимизға тоғра кәлди. шундақтиму, бу қәдәм вәзийәтни омумий җәһәттин һәл қилишни мәқсәт қилған йеңи һәрикәтләргә шараит йаритип бериду» деди.

үч тәрәп учришишидин кейин елан қилинған бирләшмә байанатта, «районниң сиҗил вә узун муддәтлик тинчлиқиға капаләтлик қилиш үчүн, әзәрбәйҗан билән әрменийә оттурисида тинчлиқ келишими имзалашқа актип тәййарлиқ қилишниң муһимлиқи»ниң тәкитләп өтүлгәнлики, өзара қобул қилинидиған һәл қилиш чарилири үстидә давамлиқ издиниш тоғрисида бирдәклик һасил қилинғанлиқи оттуриға қойулди.

байанатта, әлийев билән пашинйанниң, русийәниң җәнубий кавказ райониниң муқимлиқи вә гүллинишигә шундақла мунасивәтләрниң нормаллишишиға төһпә қошушқа тәййар икәнликидин мәмнун болғанлиқи қәйт қилинди.

рәһбәрләрниң сочидики учришишиға параллел һалда русийә, әзәрбәйҗан вә әрменийә ташқи ишлар министирлири сергей лавров, җәйһун байрамов вә арарат мизойанму үч тәрәп йиғини ачти.