«политико» журнили әрдоғанниң дипломатик ғәлибисигә йуқири баһа бәрди
түркийәниң русийә-украина урушидики васитичи роли, җумһур рәис рәҗәп таййип әрдоғанниң дипломатик ғәлибиси һәр қайси тәрәпләрниң диққитини қозғиди.
түркийә авази радийоси хәвири: америкада чиқидиған «политико» журнили интернет сәһиписидә җумһур рәис рәҗәп таййип әрдоғанниң дипломатик ғәлибиси тоғрисида мәхсус мақалә елан қилип, җумһур рәис әрдоғанниң ашлиқ каридори ечиш вә әсир алмаштуруш келишимлиридики дипломатик тиришчанлиқи вә мувәппәқийитигә йуқири баһа бәрди.
һәр қайси дөләтләрниң позитсийәлириниң 2-айниң 24-күнидин буйан давамлишиватқан украина-русийә урушиниң йөнилишигә асасән өзгәргәнлики оттуриға қойулған мақалидә, түркийәниң йәнила мурәссәчилик орнини сақлап келиватқанлиқи тәкитләнди.
ашлиқ каридори келишимидин башқа, әсирләрни алмаштуруш келишиминиңму түркийәниң сайисида һасил қилинғанлиқиға ишарәт қилинған мақалидә, «җумһур рәис әрдоған бир тәрәптин русийә билән очуқ линийәни сақлап қалмақта, йәнә бир тәрәптин, украинаниң земин пүтүнлүки вә қиримни өз ичигә алған барлиқ украина земинлириниң азадлиқини қоллайдиғанлиқини қайта – қайта тәкитлимәктә» дегән ибариләргә орун берилди.
җумһур рәис әрдоған русийә пирезиденти виладимир путин вә украина пирезиденти виладимир зеленский билән орнатқан дипломатик алақиси нәтиҗисидә 200 уруш әсириниң алмаштурулғанлиқини елан қилғаниди.
украина ашлиқини қарадеңиз арқилиқ дунйаниң һәр қайси җайлириға бихәтәр йәткүзүшни нишан қилған «истанбул ашлиқ келишими» 22-ийул истанбул долмабаһчә сарийидики җумһур рәислик мәһкимиси ишханисида җумһур рәис рәҗәп таййип әрдоған вә б д т баш катипи антонио гутерресниң иштирак қилиши билән, түркийә, б д т, украина вә русийә оттурисида имзаланғаниди.
