нигерийәдә икки черкавдин гөрүгә тутуп кетилгән 36 киши үчүн төләм тәләп қилинди
нигерийәниң кадуна өлкисидә 19 – ийун икки черкавға қилинған һуҗумда тутуп кетилгән 36 киши үчүн төләм тәләп қилинди.
түркийә авази радийоси хәвири: рубу қәбилиси рәиси елиша мари 19 – ийунда мотсиклит мингән қораллиқ унсурларниң нигерийәниң каҗуру районидики икки черкавдин 36 кишини гөрүгә тутуп кәткәнликини вә қойуп бериш бәдилигә 100 милйон нигерийә найра (тәхминән 4 милйон түрк лираси) төләм тәләп қилғанлиқини билдүрди.
йәнә бир тәрәптин, кадуна өлкилик бихәтәрлик вә ички ишлар комиссари самуил аруван районда тутқунларни қутқузуш һәрикитиниң давамлишиватқанлиқини байан қилди.
қораллиқ унсурларниң 19 - ийунда каҗуру районидики икки черкавға елип барған һуҗумда 3 киши қаза қилған вә 36 киши гөрүгә тутуп кетилгән иди.
нигерийәдә гөрүгә адәм тутқун қилиш өлүм җазаси билән җазалиниду, шундақтиму төләм үчүн адәм тутуп кетидиған вәқәләр көп йүз берип түриду.
нигерийәдә күнсери күчийиватқан бихәтәрлик мәсилисигә қарши күрәш даирисидә гөрүгә тутуп кетилгәнләр үчүн төләм төләш чәкләнгән иди.
