б д т литванийә билән русийәни җиддийчиликни күчәйтиштин сақлинишқа чақирди
бирләшкән дөләтләр тәшкилати баш катипи антонийо гутеррес литванийәниң русийәниң калинград олтурақ райониға мал тошушқа қойған чәклимиси асасида, тәрәпләрни җиддийчиликни күчәйтиветидиған һәр қандақ байанат вә һәрикәтләрдин сақлинишқа чақирди.
түркийә авази радийоси хәвири: б д т баш катибатлиқи байанатчиси стефан дуҗарич, б д т ниң нйу-йорктики баш иштабида өткүзүлгән мухбирларни күтүвелиш йиғинида, гутерресниң калинград тиранспортиға алақидар русийә билән литванийә оттурисидики җиддийликни әндишә ичидә көзитиватқанлиқини, тәрәпләрниң бу җиддийчиликни дийалог арқилиқ хәлқара қанунға уйғун шәкилдә музакирилишиши керәклики тоғрисидики көз қаришини оттуриға қойғанлиқини билдүрди.
стефан дуҗарич: «мәсилиниң техиму әвҗ елишиға қарита көргәнлиримизни вә агаһландурушларниму өз ичигә алған өзгиришләрни йеқиндин көзитиватимиз, бу интайин әндишилинәрлик җиддий бир мәсилә, җиддийчиликни күчәйтидиған һәр қандақ байанат йаки һәрикәттин сақлиниш лазим» деди.
литванийә йавропа иттипақиниң ембарго тизимликидики бир қисим малларниң дөләт территорийәси арқилиқ калинградқа йөткилишини чәклигән болуп, русийә бихәтәрлик кеңишиниң катипи николай патрошев русийәниң литванийә қойған бу чәклимиләргә мумкин қәдәр әң қисқа вақитта инкас қайтуридиғанлиқини ейтқан иди.
русийә билән калинград райони оттурисидики бирдинбир төмүр йол литванийә земинидин өтиду.
калиниңград болса, русийә билән қуруғлуқтин улиниши болмиған шундақла литванийә билән полшаниң оттурисидики балтиқ деңизи қирғиқиға җайлашқан русийә территорийәси һесаблиниду.
