nato polsha we baltiq déngizi döletliride manéwir ötküzidu

türkiye awazi radiyosi xewiri: nato hawa mudapiesini tereqqiy qildurush meqsitide, polsha we baltiq déngizi döletliride keng kölemlik manéwir ötküzidu.

«22-ramstéyin légasi» (RamsteinLegacy 22) dep nam bérilgen we 6-10 iyun künliri arisida ötküzülüshi pilan qilinghan manéwirgha, urush ayropilanliri, hawa we bashqurulidighan bomba mudapie sistémiliri qatnashturulidu. manéwir polshadin bashqa, litwaniye, éstoniye we latwiyede ötküzülidu. manéwirgha, nato ittipaqdashliri we shérikliridin teshkil tapqan 17 dölet ishtirak qilidu.

natoning mezkur manéwir heqqide élan qilghan bayanatida, rusiyening ukrainagha qarshi qozghighan urushi sewebidin ittipaq döletlirining chégralirigha yéqin jaylarda bashqurulidighan bomba, uchquchisiz hawa apparati we urush ayropilanlirining köpeygenliki eskertilip, xata hésablash we kontrolluqni yoqitip qoyush qatarliq éhtimalliqlar bilen nato rayonigha bolghan tehditning köpeygenliki qeyt qilindi.

nato ittipaqdash hawa qomandanliq ishtabining qomandani général jéf xarrijin (Jeff Harrigian) manéwir toghrisida élan qilghan bayanatida: «rusiye ukrainani ishghal qilghandin kéyin otturigha chiqqan weziyet nezerde tutulghanda, buninggha oxshash keng kölemlik manéwirlar, nato üchün éytqanda her qachanqidin téximu muhim ehmiyetke ige» dédi.

u manéwirda natoning öz rayonini qoghdash qabiliyitini kücheytishning meqset qilinidighanliqi eskertti we oxshash waqitta yene, ittipaqning rayon bixeterliki we muqimliqini sadiqliq bilen qoghdaydighanliqini körsitip béridighanliqini bildürdi.