zéléniski: rusiye bilen bolghan söhbetlerning üzülüp qélish xewpi bar
ukraina pirézidénti wladimir zéléniski rusiye bilen bolghan tinchliq söhbetlirining pütünley üzülüp qélish xewpining barliqini éytti.
türkiye awazi radiyosi xewiri: zéléniski, polshaliq zhurnalistlar bilen ötküzgen söhbitide, rusiye – ukraina otturisida uda 2 aydin köprek waqittin buyan dawamlishiwatqan urush we rusiye – ukraina tinchliq söhbetliri heqqide toxtilip mundaq dédi: «herqandaq shekildiki bir söhbetning tamamen üzülüp qélish xewpi bar. bu, rusiye armiyesi bésip kirgen jaylarning ehwali bilen zich munasiwetliktur.»
ukraina – rusiye heyetlirining oxshimighan sewiyelerde torda körüshüwatqanliqini eskertken zéléniski, mundaq dep körsetti: «biz birla artis rol alidighan siyasiy tiyatir sehnisidin orun élishni xalimaymiz. rusiye terep esir almashturushning bolidighanliqini deslepte jezmleshtüridu, lékin kéyin bu ishqa ashmaydu.»
bu mesililerning hel qilinishi üchün her ikki dölet bashliqining biwasite körüshüshi kéreklikini tekitligen zéléniski, kiyéw rayonida yéngi ammiwi mazarlarning tépilghanliqini, hazirghiche buninggha oxshighan mazarlarda jemiy 900 kishining jesitining tépilghanliqini qeyt qildi.
rusiye armiyesi, 24 – féwral küni ukrainagha herbiy heriket qozghighanidi.
