луйиги ди майо: украина урушида тинчлиқ үчүн әң җапалиқ тиришқан дөләт түркийәдур
италийә ташқи ишлар министири луйиги ди майо түркийәниң украинадики урушта тинчлиқ үчүн әң җапалиқ тиришқан дөләт икәнликини ейтти.
түркийә авази радийоси хәвири: ди майо бир радио қанилида елан қилған байанатида, русийәниң 24-февралда украинаға ачқан уруши вә әң йеңи өзгиришләр үстидә тохтилип, гәрчә тәрәпләр рәт қилсиму, өзиниң дипломатийәни тезлитиш үчүн тиришиши керәкликини билдүрди вә дипломатийәниң асаслиқ амил икәнликини оттуриға қойди.
ди майо йавропа иттипақиниң тинчлиқ йиғиниға илһам бериши керәкликини тәкитләп, «уруш тохтитиштин илгири биз тинчлиқ йиғинини илгири сүрүшимиз керәк. тинчлиқ үчүн әң җапалиқ тиришқан дөләт түркийәдур вә икки тәрәп билән сөзлишәләйду» деди.
италийә вә русийә мәсуллири оттурисида «күчлүк сөзләр» билән бәзи талаш тартишларниң йүз бәргәнликини байан қилған ди майо, шундақтиму москва билән даим очуқ қанал барлиқини тилға алди.
министир ди майо әгәр ембарголар арқилиқ русийә пирезиденти виладимир путинниң малийә күчини үзүп ташлимиса, русийә рәһбириниң бу урушни мәбләғ билән тәминләшни давамлаштуридиғанлиқини вә «ғәлибә қилимән» дегән ой билән музакирә үстилигә келишни һәргизму ойлашмайдиғанлиқини тәкитлиди.
