песков: ғәрбниң ембарголириға җаваб берилиду
русийә кремил сарийи байанатчиси дмитрий песков ғәрб дөләтлириниң ембарголириға җаваб берилидиғанлиқини билдүрди.
түркийә авази радийоси хәвири: кремил сарийи байанатчиси дмитрий песков мухбирларниң русийәниң украинадики һәрбий һәрикити вә ғәрбниң ембаргорлириға мунасивәтлик соаллириға җаваб бәрди.
у ғәрбниң ембарголириға, русийәниң мәнпәәтлирини асас қилған һалда җаваб берилидиғанлиқини билдүрүп: «әлвәттә қайтурма тәдбирләр келиду. йүргүзүлгән ембарголар йахши анализ қилиниши керәк. буниңда өзимизниң мәнпәәтлири асас болиду. пәқәт вә пәқәт өзимизниң мәнпәәтимизгә асасән һәрикәт қилимиз» деди.
у украина пирезиденти владимир зеленскийниң русийә билән көрүшүшкә тәййар икәнлики тоғрисидики байанати үстидә тохтилип: «бу йеңи байанат, йәни иҗабий һәрикәт. шуңа, буни анализ қилишимиз керәк» деди.
у зеленский билән русийә пирезиденти путинниң көрүшүш еһтимали бар-йоқлуқи тоғрисидики соалға җаваб бәрмиди.
у путинниң зеленскийни украинаниң пирезиденти дәп етирап қилидиған-қилмайдиғанлиқи тоғрисидики соалға: «әлвәттә, зеленский украинаниң пирезиденти» дәп җаваб бәрди.
у ғәрб дөләтлириниң русийәгә қарши йуқири технологийә мәһсулатлириға мунасивәтлик йүргүзгән ембарголар үстидиму тохталди вә: «әлвәттә мәсилиләр көрүлиду, әмма һәл қилғили болмайдиған мәсилиләр әмәс» дәп җаваб бәрди.
русийә ташқи ишлар министирлиқи йавропа иттипақиниң русийәгә қарши йүргүзгән ембарголириға қаттиқ җаваб қайтурулидиғанлиқини билдүргән иди.
министирлиқниң байанатчиси марийа захарова ғәрбниң ембарголириға қарши һазирғичә болғиниға охшаш җаваб қайтурулидиғанлиқини, вәзийәтниң тәқәззаси бойичә иш қилидиғанлиқлирини қәйт қилған иди.
русийә түнүгүн (24-феврал) украинаға һуҗум башлиған иди.
