Pfizer شىركىتى بۇ يىللىق كىرىمىنىڭ 54 مىليارد دوللارغا يېتىشىنى مۆلچەرلەۋاتقانلىقىنى بىلدۈردى

تۈركىيە ئاۋازى رادىيوسى خەۋىرى: ئامېرىكا دورا شىركىتى — Pfizer،  2021 – يىلىنىڭ تۆتىنچى چارىكىگە مۇناسىۋەتلىك كىرىم – چىقىم كۆرسەتكۈچ جەدۋىلىنى جامائەتچىلىك بىلەن ئورتاقلاشتى؛ باياناتتا، شىركەتنىڭ ئۆتكەن يىلنىڭ ئاخىرقى چارىكىدىكى كىرىمىنىڭ 2020 - يىلىنىڭ ئوخشاش مەزگىلىگە سېلىشتۇرغاندا %105 ئېشىپ، 23 مىليارد 800 مىليون دوللارغا يەتكەنلىكىگە ئىشارەت قىلىندى.

Pfizer شىركىتىنىڭ 2021 – يىلى كىرىمىنى ئالدىنقى يىلغا سېلىشتۇرغاندا ئىككى ھەسسە ئاشۇرۇپ، 81 مىليارد 300 مىليون دوللارغا يەتكۈزگەنلىكىگە دائىر ئۇچۇرلارغا ئورۇن بېرىلگەن باياناتتا، شىركەتنىڭ بۇ يىلقى كىرىم مۆلچەرىنىڭ 98 مىليارد دوللار بىلەن 102 مىليارد دوللار ئارىلىقىدا ئىكەنلىكى ئوتتۇرىغا قويۇلدى ھەمدە Pfizerنىڭ گېرمانىيە بىئوتېخنىكا شىركىتى — بىئونتېك بىلەن بىرلىشىپ تەرەققىي قىلدۇرغان كوۋىد-19 ۋاكسىنىسى بىلەن دورىسىدىن بۇ يىل جەمئىي 54 مىليارد كىرىم قىلىشىنى كۈتۈۋاتقانلىقى قەيت قىلىندى.

باياناتتا، بۇ مەلۇمات تېخىمۇ تەپسىلاتلاندۇرۇلۇپ، ۋاكسىدىن 32 مىليارد دوللار، كوۋىد -19 بىمارلىرى ئۈچۈن ياسالغان «پاكسلوۋىد» دورىسىدىن 22 مىليارد دوللار كىرىم قىلىشنىڭ مۆلچەرلىنىۋاتقانلىقى ئوتتۇرىغا قويۇلدى.