русийәниң хитай билән йеқин мунасивәт орнитиши, ембарголарға ақмайду
америка ташқи ишлар министирлиқи байанатчиси прайс русийә украинани ишғал қилған әһвалда, ембарголарниң тәсирини азайтиш үчүн хитай билән йеқин мунасивәт орнатсиму, москваға төлитилидиған иқтисадий бәдәлгә кар қилмайдиғанлиқини ейтти.
түркийә авази радийоси хәвири: америка ташқи ишлар министирлиқи байанатчиси нед прайс күндилик ахбарат елан қилиш йиғинида, русийә-украина киризиси үстидә тохтилип, русийә украинаға таҗавуз қилған әһвалда американиң еғир иқтисадий ембаргосиға дучар болидиғанлиқини тәкрарлиди.
у русийәниң ембарголарниң тәсирини азайтиш үчүн хитай билән йеқин мунасивәт орнитишқа тиришиватқанлиқи тоғрисидики соалға: «украинаниң ишғал қилиниши, пәқәт украина вә йавропа үчүнла әмәс, бәлки хитайни өз ичигә алған район сиртидики дөләтләргиму тәсир қилиду» деди.
у америка ташқи ишлар министири антони блинкенниң хитай ташқи ишлар министири ваң йи билән көрүшкәндә, русийәниң урушқақлиқи сәвәб болидиған дунйа хәвпсизлики вә иқтисадий хәтәрләрниң интайин еғир болидиғанлиқини тәкитләп, хитайниңму буниң тәсиригә учрайдиғанлиқини ейтқанлиқини билдүрди.
у украинани ишғал қилишниң, русийәгә наһайити еғир иқтисадий бәдәллириниң болидиғанлиқини билдүрүп: «русийә хитай билән йеқин мунасивәт орнитип, бу ақивәтләрниң бир қисминиң орнини толдуралаймән, бир қисминиң бесимини йәңгиллитәләймән дәп ойлиған болса, әһвал ундақ әмәс. ембарголар русийә иқтисадини нурғун җәһәттин техиму аҗизлитиду. мәсилән, асасий технологийәләрниң мәнбәсиниң қәйәрдин кәлгәнликигә қарисақла болиду. булар һазирму ғәрбтин келиду. өзини өзи ғәрб билән сода қилиштин, ғәрб билән йавропадин вә америкадин импорт қилиштин мәһрум қилиду. ишләпчиқириш һәҗимини вә йеңилиқ йаритиш йошурун күчини еғир төвәнлитиветиду» деди.
