байдин хизмәтчиләргә ваксина әмләш мәҗбурийитиниң даирисини кеңәйтти

түркийә авази радийоси хәвири: америка пирезиденти җо байдин буниңдин илгири бири қисим федератсийә хизмәтчилириниң мәҗбурий ваксина әмлитиши тоғрисидики буйруқиниң даирисини кеңәйтип, барлиқ федератсийә вә сәһийә хизмәтчилири билән  100 дин артуқ хизмәтчиси болған хизмәт орунлиридики кишиләрниң ваксина әмлитишиниң шәрт икәнликини җакарлиди.

пирезидент җо байдин ақсарайда өткүзүлгән мухбирларни күтүвелиш йиғинида, вухән вируси (ковид – 19) ға қарши күрәш даирисидә ташлинидиған йеңи қәдәмләрни елан қилди.

қоллирида йуқумниң тарқилишиниң алдини алидиған ваксинаға охшаш күчлүк қоралниң барлиқини тәкитлигән байдин: «америкадики 80 милйон кишиниң техи ваксина әмләткүзмигәнликини көрүш кишини үмидсизләндүриду» дегәнләрни қәйт қилди.

у, йуқумниң делта варийанти сәвәбидин дөләтниң қийин күнләрни баштин кәчүрүватқанлиқиға ишарәт қилип: «бу йуқум, ваксина әмләнмигәнләрниң йуқуми» деди.

байдин , ваксина әмләш мәҗбурийитиниң даирисиниң кеңәйтилгәнликини, униң барлиқ федератсийә вә сәһийә хизмәтчилири билән 100 дин артуқ хизмәтчиси бар хизмәт орунлирида ишләйдиғанларни өз ичигә алидиғанлиқини байан қилип: «ваксина әмләш шәхсий әркинлик әмәс, әтрапиңиздикиләрни қоғдаштур» деди.

америка пирезиденти байдин һазирғичә ваксина әмләткүзмигәнләргә хитабән: «ваксина әмлитиш үчүн немини сақлаватисиләр? һазир тоғра йолни таллап, ваксина әмлитиңлар» дәп чақириқ елан қилди.

байдин, әгәр ваксина әмләткүзгәнләрни қоғдаш үчүн қошумчә ваксина әмләш тәстиқланса, қоллирида йетәрлик дәриҗидә үчинчи қута ваксинаниң барлиқини тәкитлиди.

йуқумға мунасивәтлик тәдбирләрниң тәсиригә әң көп мәктәпләрниң учрайдиғанлиқини байан қилған байдин, зөрүр тәдбирләрни йолға қойуп мәктәпләрни очуқ тутуш үчүн пүтүн күчи билән тиришидиғанлиқлирини сөзлиригә илавә қилди.