ناتو: تالىبان ئافغانىستاننى قولغا كىرگۈزگەن تەقدىردە ئېتىراپ قىلىنمايدۇ

تۈركىيە ئاۋازى رادىيوسى خەۋىرى: ستولتېنبېرگ، بۇ ھەقتە ئېلان قىلغان يازما باياناتىدا، شىمالىي ئاتلانتىك ئەھدى تەشكىلاتى ئەزالىرىنىڭ تۈنۈگۈن ئافغانىستاننىڭ ۋەزىيىتى ھەققىدە كېڭىشىش ئۈچۈن بىر يەرگە جەم بولغانلىقىنى تەكىتلەپ مۇنداق دېدى: «نىشانىمىز، ئافغانىستان ھۆكۈمىتى ۋە دۆلەت خەۋپسىزلىك كۈچلىرىنى ئىمكانىيەتنىڭ بارىچە قوللاشتۇر، خادىملىرىمىزنىڭ بىخەتەرلىكى ھەممىدىن مۇھىمدۇر، كابۇلدىكى دىپلوماتىك مەۋجۇدىيىتىمىز داۋاملىشىدۇ.»

تۈرلۈك شەكىلدىكى كىشىلىك ھوقۇق دەپسەندىچىلىكلىرىدىن سىرت يەنە، تالىبان سەۋەب بولۇۋاتقان ئېغىر دەرىجىدىكى زوراۋانلىقلاردىن قاتتىق ئەندىشە قىلىنىۋاتقانلىقىنى تەكىتلىگەن ستولتېنبېرگ، مۇنداق دەپ كۆرسەتتى: «تالىبان، ئەگەر دۆلەتنى زورلۇق بىلەن قولغا كىرگۈزسە، خەلقئارا جەمئىيەت تەرىپىدىن ئېتىراپ قىلىنمايدىغانلىقىنى چۈشىنىپ يېتىشى كېرەك، بىزنىڭ كىرىزىسنى سىياسىي يوللار ئارقىلىق ھەل قىلىش چارىسىنى قوللاش ئىرادىمىز قەتئىيدۇر.»