taliban afghanistan zéminining xitaygha qarshi ishlitilmeydighanliqigha kapalet berdi
talibanning qatardiki siyasiy ishxanisining bashliqi molla abdul gheni birader bashchiliqidiki bir heyet xitayni ziyaret qildi.
türkiye awazi radiyosi xewiri: shinxua agéntliqining xewirige asaslanghanda, xitay tashqi ishlar ministiri wang yi tyenjén shehiride molla abdul gheni birader bilen körüshken.
uchrishishta, wang yi xitayning eng chong qoshnisi bolghan afghanistanning igilik hoquqi, musteqilliqi we zémin pütünlükige izchil hörmet qilip kelgenlikini hemde döletning ichki ishlirigha arilashmasliq kéreklikide ching turup kelgenlikini tekitlidi.
wang yi washington hökümitining afghanistan siyasitining meghlub bolghanliqini bildürüp, afghanistandiki her qaysi tereplerning «afghanistanni afghanistanliqlar bashqurushi kérek» pirinsipi asasida baldurraq tinchliq ornitishi kéreklikini tekitlidi we: «afghanistan afghanistan xelqige mensup, afghanistanning kelgüsi we teqdiri afghanistan xelqining qolida bolushi kérek» dédi.
taliban teripidin élan qilinghan bayanatta, 9 kishilik heyetning xitaygha ikki künlük ziyaret üchün barghanliqi we xitay tashqi ishlar ministiri bilen tinchliq musapisi shundaqla bixeterlik mesililiri toghrisida söhbetleshkenlikini bildürdi.
talibanning qatarda turushluq siyasiy ishxanisining bayanatchisi muhemmed naimmu tiwittérda hembehirligen bayanatida: «söhbette siyaset, iqtisad we her ikki döletning bixeterliki shundaqla afghanistanning nöwettiki weziyiti we tinchliq musapisigha alaqidar témilar muzakire qilindi» dédi.
muhemmed naim taliban heyitining xitaygha afghanistan zéminining her qandaq bir döletke qarshi ishlitilishige qetiy yol qoyulmaydighanliqigha dair kapalet bergenlikini jakarlidi.
wangning taliban heyiti bilen chüshken süritimu ijtimaiy taratqularda hembehirlendi.
afghanistanning tinchliq musapisi éniqsizliqini dawamlashturmaqta. bixeterlik qisimliri bilen taliban otturisida shiddetlik toqunushlarmu üzlüksiz dawamlashmaqta.
