косовуниң ғәрбидә тәхминән 1500 киши зәһәрләнди

түркийә авази радийоси хәвири: дечан шәһәр башлиқи башким рамосаҗ твиттерда елан қилған байанатида, тәхминән 1500 кишиниң намәлум сәвәбләр билән зәһәрлинип, дохтурханиға көрүнгәнликини ейтти.

рамосаҗ қанун даирисидә пүтүн  шәһәр миқйасида җиддий һаләт елан қилинғанлиқини уқтурди.

мақулланған қарардин кейин, шәһәрлик һөкүмәткә зәһәрләнгәндин кейинки җиддий һаләтни контрол қилишқа тәййар туруш вәзиписи берилди.

дечан шәһәрлик һөкүмити аиливи теббий мәркизиниң мудири селмон бериша мухбирларни күтүвелиш йиғинида, бемарларниң %99 ниң дечанда сәһийә мулазимити билән тәминләнгәнликини, аз сандики кишиләрниң қошна шәһәр ипәккә йолланғанлиқини ейтти.

селмон бериша зәһәрләнгәнләрниң саламәтлик әһвалиниң йахши икәнликини уқтурди.

йәнә бир тәрәптин, косову таратқулирида 2 кишиниң зәһәрлиниш сәвәбидин қаза қилғанлиқи билдүрүлди, әмма косову сәһийә министири арбен витйа бу өлүм вәқәсиниң зәһәрлиниш билән мунасивити йоқлиқини елан қилди.

дечанға қарашлиқ 6 йезисидики аһалиләрниң йеқинқи күнләрдә ичимлик ​​су билән зәһәрләнгәнликлиригә даир гуманлар тарқалмақта иди.

косову дөләтлик аммиви сәһийә институтиниң мудири насир рамадани йеза-кәнтләрдин елинған су әвришкисини тәһлил қилғанлиқини вә судин зәһәрлинишни байқимиғанлиқини елан қилди.

рамадани бу әһвал һәққидә тәпсилий тәкшүрүш елип берилидиғанлиқини вә амминиң учур билән тәминлинидиғанлиқини тәкитлиди.