كولومبىيەدە 11 كان ئىشچىسىنىڭ جەسىتى ئارىدىن 21 كۈن ئۆتكەندىن كېيىن تېپىلدى

تۈركىيە ئاۋازى رادىيوسى خەۋىرى: كولومبىيە دۆلەتلىك كان ئىدارىسى (ANM) تەرىپىدىن ئېلان قىلىنغان باياناتتا، نېيرا ناھىيەسىگە قاراشلىق ئەلبۇسكىيۇ يېزىسىدا قانۇنسىز ئالتۇن كانىدا ئىشلەۋاتقان 11 كان ئىشچىسىنىڭ سۇدا تۇنجۇقۇپ قازا قىلغانلىقى بىلدۈرۈلدى.

كولومبىيەدىكى قانۇنسىز كانلاردا بىخەتەرلىك تەدبىرلىرىنىڭ ۋە نازارەتنىڭ كەمچىللىكى سەۋەبىدىن نۇرغۇن ئەجەللىك ھادىسىلەر يۈز بېرىپ كەلمەكتە.

دۆلەتلىك كان ئىدارىسى (ANM) نىڭ بىلدۈرۈشىچە 2020-يىلى 161 كان ۋەقەسى يۈز بېرىپ، 171 كىشى قازا قىلغان. يىل بېشىدىن بۇيان يۈز بەرگەن 27 كان ۋەقەسىدىمۇ 43 كان ئىشچىسى ھاياتىدىن ئايرىلغان.

كولومبىيەدە 2010-يىلى يۈز بەرگەن كۆمۈر كان پارتلاش ۋەقەسىدە 73 كىشىنىڭ قازا قىلىشى «دۆلەت تارىخىدىكى ئەڭ ئېچىنىشلىق ھادىسە» دەپ قەيت قىلىنغان ئىدى.