шаһзадә муһәммәд бин сәлманға ембаго йүзгүзүш қанун лайиһәси америка авам палатасиға сунулди
америка авам палатасиниң үч әзаси җамал кашиқчиниң өлтүрүлүшидә җавабкарлиқи болғанлиқи сәвәбидин сәуди әрәбистанниң тәхт вариси шаһзадә муһәммәд бин сәлманғиму ембарго йүргүзүлиши керәкликини өз ичигә алған қанун лайиһәси сунди.
түркийә авази радийоси хәвири: палата әзалиридин том малиновиски, җамис мик говерн вә андий ким мәҗлис омумий йиғиниға «сәуди әрәбистанниң еғир кишилик һоқуқ дәпсәндичилики җавабкарлиқ қануни» намлиқ қанун лайиһәсини сунғанлиқини елан қилди.
қанун лайиһәсидә, дөләтлик истихбарат идариси (DNI) тәрипидин елан қилинған доклатта, тәхт вариси шаһзадә муһәммәд бин сәлманниңму сәуди әрәбистанлиқ журналист җамал кашиқчиниң өлтүрүлүшидә җавабкарлиқи барлиқи ениқ оттуриға қойулғанлиқи вә шуңа униңму ембарго тизимликигә киргүзүшүлиши керәклики тәкитләнди.
қанун лайиһәсидә йәнә, америка сәуди әрәбистанға сетип бәргән қоралларниң ишлитилишиниң америка қануниға уйғун болуватқан йаки болмайватқанлиқи тоғрисида палатаға қәрәллик доклат бериш керәкликиму айрим маддә сүпитидә киргүзүлди.
бу қанун лайиһәсиниң мақуллиниши үчүн алди билән авам палатасида беләт ташлаш арқилиқ тәстиқлиниши, андин кеңәш палатасидиму тәстиқтин өтүп, ахирида пирезидент байдин имза қойуши керәк.
дөләтлик истихбарат идариси (DNI) тәрипидин җүмә күни елан қилинған вә җамал кашиқчиниң өлтүрүлүшини шаһзадә муһәммәд бин сәлманниң тәстиқлиғанлиқи әскәртилгән доклати зор инкас қозғиған болуп, әмма байдин һөкүмити муһәммәд бин сәлманға қарита һечқандақ ембарго қарари чиқармиған иди.
тәхт вариси шаһзадә муһәммәд бин сәлманға қаратқан тәнқидлири билән тонулған «вашингтон почтиси» гезитиниң сәуди әрәбистанлиқ йазғучиси җамал кашиқчи 2018-йили 10-айниң 2-күни сәуди әрәбистанниң истанбулдики баш консулханисиға киргәнчә қайтип чиқалмиған иди.
кейинчә җамал кашиқчиниң консулханида өлтүрүлгәнлики вә җәситиң парчиланғанлиқи ашкариланған иди.
