трамп әзәрбәйҗан билән әрменийә оттурисидики уруш тохтитишниң бузулғанлиқидин әпсусланди
америка пирезиденти доналд трамп әзәрбәйҗан билән әрменийә оттурисидики уруш тохтитишниң бузулғанлиқини көрүшниң әпсуслинарлиқ иш болғанлиқини билдүрди.
түркийә авази радийоси хәвири: доналд трамп мичиган иштатида өткүзидиған йиғилиш үчүн айропиланиға чиқиштин илгири андревс һава армийә базисида мухбирларниң соаллириға җаваб бәрди.
бир мухбирниң «әрменийә билән әзәрбәйҗан оттурисидики уруш тохтитишниң бузулғанлиқидин әпсусландиңизму?» дегән суалиға трамп: «әзәрбәйҗан билән әрменийә йахши чүшинишәлмәйватиду. узундин буйан бу мәсилә билән һәпилишиватимиз. шундақ, уруш тохтитишниң бузулғанлиқини көрүш әпсуслинарлиқ бир иш» деди.
доналд трамп узундин буйан өзара чүшинишмәслик болған дөләтләрдә уруш тохтитишниң бузулуп келиватқанлиқини әскәртип, «улар йәнә қайта бир йәргә җәм болиду» деди.
әзәрбәйҗанниң муавин пирезиденти һикмәт һаҗийев түнүгүн тивиттер һесабида елан қилған байанатида, әрменийәниң пуқраларға ишлитилиши чәкләнгән мискәт бомбилиқ смерч башқурулидиған бомба билән қарайусуфлу шәһиридики пуқраларни бомбардиман қилғанлиқини билдүргән иди.
һаҗийев һуҗумда 4 кишиниң қаза қилғанлиқини вә 13 кишиниң йариланғанлиқини уқтурған иди.
америка әзәрбәйҗан билән әрменийәниң келишкәнликини җакарлиған тағлиқ қарабағда вақитлиқ инсанпәрвәрлик уруш тохтитиш келишими, 26 – өктәбир шу йәрниң вақти саәт 08:00 дә күчкә игә болған иди.
