p k k ning sinjardiki lagérliri singha élindi
iraqning musul shehirige qarashliq sinjar nahiyesidiki mewjudiyitige xatime bérilishi kütülüwatqan bölgünchi térrorluq teshkilati p k k ning rayondiki paaliyetliri dawamlashmaqta.
türkiye awazi radiyosi xewiri: anadolu agéntliqi, uda 6 yildin buyan musul wilayitining sinjar nahiyeside herbiy we siyasiy paaliyetlerni élip bériwatqan bölgünchi térrorluq teshkilati p k k gha ait lagérlar we siyasiy paaliyet sahelirini singha aldi.
iraq hökümiti bilen iraq kord rayonluq hökümiti otturisida imzalanghan kélishimge, p k k ning sinjardiki mewjudiyitige xatime bérish maddisining kirgüzülüshi, teshkilatning rayondiki mewjudiyitini yene bir qétim küntertipke élip keldi.
anadolu agéntliqi, térrorluq teshkilati p k k ning sinjardiki lagérlirini singha élish arqiliq, teshkilatning rayondiki mewjudiyitining dawamlishiwatqanliqini ispatlap berdi.
anadolu agéntliqi muxbiri singha alghan körünüshlerde, p k k térrorchiliri orunlishiwalghan sinjarda, teshkilatqa ait meshiq lagérliri, atalmish xelq mejlisliri we kontrol nuqtiliri közge chéliqidu.
baghdad we erbil otturisidiki salaiyiti talash – tartishliq rayonlardin biri bolghan, hemde térrorluq teshkilati p k k mewjudiyitini dawamlashturuwatqan sinjardiki saqliniwatqan mesililerni hel qilish meqsitide, 9 – öktebir küni paytext baghdadda ötküzülgen yighinda kélishim hasil qilinghanliqi uqturulghanidi.
iraq bash ministiri mustafa elqazimining riyasetchilikide chaqirilghan yighingha, birleshken döletler teshkilati bash katipining iraq alahide wekili Jeanine hennis, iraq kord rayonluq hökümiti heyiti we eziyi xelqining wekilliri qatnashqanidi.
térrorluq teshkilati p k k, 2014 – yili, térrorluq teshkilati daéshni bahane qilip, sinjar we etrapigha orunlishiwalghanidi.
