ливийә дөләтлик алий кеңиши рәиси һафтәр билән түзүлгән келишимгә қарши чиқти
ливийә дөләтлик алий кеңишиниң рәиси халид әл мишри дөләтниң шәрқидики қанунсиз қораллиқ күчләрниң рәһбири хәлифә һафтәр билән дөләтниң нефит ишләпчиқириш вә експортни әслигә кәлтүрүш тоғрисидики келишимигә қарши икәнликини елан қилди.
түркийә авази радийоси хәвири: халид әл мишри ливийә баш министири файиз әс сәрраҗқа йазған хетидә, муавин баш министир әһмәд муайтик билән һафтар оттурисида түзүлгән келишимниң суһәйрат келишимигә вә йолға қойулуватқан қанунларға хилап икәнликини билдүрүп, келишимгә даир җидди тәкшүрүш башлашни тәләп қилди.
халид әл мишри мәзкур келишимгә «авам палатаси, дөләт кеңиши, президент кеңиши вә ливийә мәркизи банкисиниң қануний һәқ - һоқуқиға хилаплиқ қилғанлиқ» дәп баһа бәрди.
иқтисади пүтүнләй дегүдәк нефитни асас қилидиған ливийәдә, һидро карбон байлиқиниң тәхминән% 80 и дегүдәк һафтәр қораллиқ унсурлириниң контроллуқидики шәрқий районлардин чиқиду.
һафтәр бирләшкән дөләтләр тәшкилати тәрипидин қанунлуқ һөкүмәт дәп қобул қилинған ливийә һөкүмитигә қарши нефитни кузир орнида ишлитип, һөкүмәткә тәвә киримини азайтиш мәқситидә контроллуқи астидики районларниң нефит саһәлирини йанвар ейида тақивалған иди.
һафтәр 8 айдин буйан тақивалған нефит саһәлирини җүмә күни қайтидин ачқанлиқини елан қилған шундақла нефит кириминиң адил тәқсимлинишигә капаләтлик қилидиған керәклик шараит вә тәдбирләрни қоллиниш арқилиқ нефит ишләпчиқириш вә експортиниң башланғанлиқини җакарлиған иди.
