хитай америкадин охшаш дәриҗидә өч алидиғанлиқини җакарлиди

түркийә авази радийоси хәвири: хитай, американиң хоңкоң валийси кари ламни өз ичигә алған 11 кишигә ембарго йүргүзүш қарарини әйибләйдиғанлиқини елан қилди вә хитайниңму 11 америка әмәлдариға ембарго йүргүзүшни қарар қилғанлиқи уқтурулди.

хитай ташқи ишлар министирлиқи байанатчиси җав личен бейҗиңда өткүзүлгән қәрәллик мухбирларни күтүвелиш йиғинида, американиң хоңкоң әмәлдарлириға җаза йүргүзүш қарари арқилиқ ашкара һалда хоңкоңға арилишивалғанлиқини вә хитайниң ички ишлириға еғир мудахилә қилғанлиқини ейтти.

җав личен: «америка мунасивәтлик қарари билән хәлқара қанун вә хәлқаралиқ асасий өлчәмләргә еғир дәриҗидә хилаплиқ қилди. хитай тәрәп бу әһвалға қәтий қарши туриду» деди һәмдә хитайниң йәнә хокоңға мунасивәтлик мәсилиләргә начар муамилә қилип келиватқан америка әмәлдарлириға ембарго йүргүзүшни қарар қилғанлиқини билдүрди.

җав личен ембарго йүргүзилидиған кишиләрниң америка кеңәш палата әзаси марко рубио, тед круз вә кишилик һоқуқни көзитиш тәшкилатиниң мудири кеннит рот қатарлиқ 11 киши икәнликини билдүрди. лекин җаза қарариниң даириси һәққидә һечқандақ мәлумат бәрмиди.

америка малийә министирлиқи 7 - авғустта елан қилған йазма байанатида, «хоңкоңниң аптономийәлик салаһийитигә бузғунчилиқ қилған вә хоңкоң хәлқиниң пикир вә йиғилиш әркинликини чәклигән» дегән сәвәб билән хитай әмәлдарлиридин 11 кишиниң җаза тизимликигә киргүзүлгәнлики тәкитләнгән иди.