putin 2036-yilghiche pirézidént bolidu
rusiye pirézidénti wladimir putingha 2036-yilghiche pirézidént bolush yolini achqan référandumda, resmiy bolmighan netijilerge asaslanghanda, %77.92 qollash awazi chiqqan.
türkiye awazi radiyosi xewiri: rusiye merkizi saylam komitéti asasiy qanungha özgertish kirgüzüshni öz ichige alghan référandumning awazini sanashni axirlashturdi.
rusiye merkizi saylam komitétining melumatlirida körsitilishiche, texminen 110 milyon 500 ming saylighuchining référandumgha qatnishish nisbiti %65 bolghan.
resmiy bolmighan netijilerge asaslanghanda, référandumgha qatnashqanlarning %77.92 i asasiy qanungha özgertish kirgüzüshni qollighan, %21.27 i qarshi chiqqan.
asasiy qanungha kirgüzülgen özgertishte, putinning 2012-yili bashlanghan we 2024-yili axirlishidighan ikki nöwetlik wezipe ötesh mudditini emeldin qalduridighan madda orun alidu.
bu madda boyiche, 20 yildin buyan hakimiyet béshida turuwatqan putin, ikki nöwitini bikar qilghan layihe arqiliq asasiy qanunda üchinchi nöwet pirézidént bolush cheklengen bolsimu, qaytidin pirézidént bolalaydu. bu qétimqi asasiy qanungha özgertish kirgüzüshte, putinning 2036-yilghiche pirézidént bolush yoli échilghan boldi.
rusiye öktichiliri référandumning qanuniy asasining yoqluqini, mezkur référandumning özgertishning 67 yashliq putingha ömri boyiche pirézidént bolushining yolini échish üchün ötküzülgenlikini ilgiri sürmekte.
