әнглийә парламенти баш вәзир җонсонни сораққа тартти

түркийә авази радийоси хәвири: әнглийә парламентиниң авам палатаси баш вәзир борис җонсондин җорҗ флойдниң өлүми тоғрисида соаллар сориди.

әнглийә ишчи партийәсиниң рәһбири кейир стармер (Keir Starmer) флойдниң өлүмидин чөчигәнликини билдүрүп: «бу җинайәт, америка вә башқа дөләтләрдики ирқий айримичилиқниң йолини ечип бериду» деди.

у баш вәзир борис җонсонниң мәзкур мәсилигә қарита бир нәрсә демигәнликиниң, өзини интайин һәйран қалдурғанлиқини әскәртип: «борис җонсонниң америка пирезиденти доналд трамп билән кейинки қетим сөзләшкәндә, трампниң вәқәләргә тутқан позитсийәсидин әнглийәниң йиргәнгәнликини билдүрүшини үмид қилимән» деди.

баш вәзир борис җонсон йуқиридики әйибләшләргә қарита, флойдниң өлтүрүлүшиниң кишини чөчитидиғанлиқини вә қобул қилғили болмайдиғанлиқини, бирақ хәлқниң тинчлиқ усулда намайиш қилиши керәкликини билдүрди.

шотландийә дөләт партийәсиниң әнглийә парламентидики гурупписиниң рәһбири ийан бләкфорд (Ian Blackford), баш вәзир борис җонсонни һазирғичә мәзкур мәсилидин өзини қачурушқа урунуш билән әйибләп, америка пирезиденти трамп билән көрүшкәндә, немә дәйдиғанлиқини вә «қара тәнликләрниң һайатиму қиммәтлик» дәп дәйдиған-демәйдиғанлиқини сориди.

баш вәзир бу соалға: «әлбәттә, қара тәнликләрниң һайатиму қиммәтлик. пәқәт америкадикила әмәс, бәлки дунйадики вә бизниң дөлитимиздики ғәзәп-нәпрәтни, қайғуни пүтүнләй чүшинимән» дәп җаваб бәрди.

баш вәзир борис җонсон намайиш қилиш һоқуқини қоллайдиғанлиқини, бирақ намайишларниң қанун вә иҗтимаий мусапә қаидәлиригә бойсунған һалда қилиниши керәкликини әскәртти.