баш вәзир борис җонсон хизмитигә қайтти

түркийә авази радийоси хәвири: баш взир борис җонсон түнүгүн (2020-йили 26-апрел) баш вәзирлик мәһкимисидики ишханисиға вә 10-номурлуқ туралғусиға қайтип кәлди. у бүгүн (2020-йили 27-апрел) министирлар кеңишиниң телевизийә йиғиниға башчилиқ қилиду.

борис җонсонниң күндилик ахбарат елан қилиш йиғиниғиму қатнишидиғанлиқи пәрәз қилинмақта.

«телеграф гезити» ниң хәвиридә билдүрүлишичә, борис җонсонниң бу һәптә чәклимиләрни йәңгиллитишкә мунасивәтлик пиланларни елан қилишиму күтүлмәктә икән.

мәзкур гезитниң зийаритини қобул қилған, әмма нам-шәрипини ашкарилимиған борис җонсонниң бир йардәмчиси, баш вәзирниң чәклимә тәдбирләрни йәңгиллитиши мумкинликини ейтқан.

2020-йили 7-май күниниң, һөкүмәтниң карантин тәдбирлирини қануний җәһәттин көздин кәчүрүши керәк болған күн икәнликини әскәрткән бу йардәмчи: «баш вәзир чәклимиләрни буниңдин бурун өзгәртишни халиса йаки пәқәт болмиғанда, буниңдин бурун бир ишларни уқтурушни халиса, қилса болиду. ‹карантинни ахирлаштуруш› дегән гәп хата. ‹карантинни тәртипкә селиш› дейиш тоғра» деди.

әнглийәдә 2020-йили 23-март карантин тәдбирлири йолға қойулған болуп, магезин вә дориханилардин башқа барлиқ йәрләр тақалған иди. бәзи карантин тәдбирлири 16-апрелдин башлап үч һәптә узартилған иди.

27-март баш вәзир борис җонсонниң вухән вируси билән йуқумланғанлиқи байқалған иди. 5-апрел кәчтә аридин 10 күн өткән болсиму, саламәтлики йахшиланмиғачқа дохтурханида йатқузулған, әтиси җиддий қутқузушқа елинған иди. 9-апрел җиддий қутқузуштин чиққан, 12-апрел болса дохтурханидин чиққан иди.

баш вәзир борис җонсонниң дохтурханидин чиққандин кейин, бир мәзгил дәм алидиғанлиқи уқтурулған иди.