бирма аракан мусулманлириға қарита ирқий қирғинчилиқни давамлаштурмақта

түркийә авази радийоси хәвири: аракан роһиңгийа бирләшмиси (ARU) тәрипидин елан қилинған доклатта, дунйадики дөләтләр ковид -19 ниң тарқилишиға тақабил  туруш билән болуватқан бир мәзгилдә, бирманиң қораллиқ тоқунуш, ирқий қирғинчилиқ вә җинайи қилмишларниң мәркизигә айланғанлиқи билдүрүлди.

доклатта аракан өлкисидики кәм дегәндә 7 шәһәрдә миңлиған араканлиқ мусулманларниң тоқулма, асассиз җинайәтләр билән йаки һечқандақ әйибләнмәстинла түрмиләргә ташланғанлиқи һәққидә мәлумат берилди.

доклатта йурт - маканлиридин қоғлап чиқирилған аракан мусулманлириниң лагерларда йаки аракан мусулманлири вә башқа милләтләрниң йезилирида туруватқанлиқи шундақла ковид -19 йуқуминиң еғир хәвипигә дуч келиватқанлиқи әскәртилди.

доклатта, ислам һәмкарлиқ тәшкилати вә хәлқара җамаәтчиликтин, аракан мусулманлирини өз ичигә алған аракандики барлиқ хәлқләрни ковид-19 апитигә қарши қоғдаш һәмдә йалған әйибләшләр билән түрмигә ташланған барлиқ аракан мусулманлирини қойуп бериш, аракан мусулманлириниң лагерлирида, ковид-19 апитигә қарши тәдбирләр даирисидә керәклик йардәмләрни бериш вә райондики интернет чәклимисини әмәлдин қалдуруш үчүн бирма һөкүмитигә бесим ишлитиш тәләп қилинди.

бирләшкән дөләтләр тәшкилатиниң билдүришичә, 2017 - йили 8 - айдин кейин аракандики зулум вә зийанкәшликтин қечип, баңладишта панаһланғанларниң сани 900 миңға йәткән.

б д т вә хәлқара кишилик һоқуқ тәшкилатлири аракан мусулманлириға қаритилған зораванлиқни «ирқий тазилаш һәрикити» вә  «ирқий қирғинчилиқ» дәп атиған иди.