b d t da wirusqa qarshi chaqiriq maqullandi, emma rusiye layihesi qobul qilinmidi

türkiye awazi radiyosi xewiri: norwégiye, shiwéytsariye, singapor, hindonéziye, lichténshtéyn we gana qatarliq döletler teripidin teyyarlanghan we 193 ezagha ige b d t omumiy kéngishide 188 dölet tonushturghan qarar layihesi, awaz birliki bilen maqullandi.

mezkur qarar, wuxen wirusigha munasiwetlik chiqirilghan  tunji b d t qarari bolush alahidilikige ige.

wuxen wirusi sewebidin bir yerge toplinalmighan omumiy kéngeshte, awazgha qoyush ishliri yéngi qaideler ramkisida élip bérildi. tünügün (2020-yili 2-aprél) awazgha qoyulghandin kéyin, her qaysi döletlerge shu yer waqti 18:00 giche étiraz qilish hoquqi bérildi.

bérilgen waqit toshqandin kéyin, héchqandaq étiraz bolmighanliqi üchün, qarar awaz birliki bilen qobul qilinghan boldi we ijra qilinishqa bashlidi.

wuxen wirusining jemiyetlerdiki weyran qilish xaraktérlik tesiri, iqtisad, dunyawi sayahet we sodigha körsitidighan tesirliri alahide tekitlengen qararda, kembeghel we wirusning eng éghir tesirige uchrighan döletlerge yardem qilish kérekliki eskertildi.

wirusqa qarshi dunyawi ittipaqliq we xelqaraliq hemkarliqni kücheytish chaqiriq qilinghan qararda, wuxen wirusigha qarshi turushta her türlük ayrimichiliq, irqiy ayrimichiliq we chet elliklerge düshmenlik qilishqa qarshi turush we kishilik hoquqqa hörmet qilish kérekliki qeyt qilindi.

rusiye b d t omumiy kéngishige sunghan wuxen wirusi seweb bolghan qiyinchiliqlar qarshisida soda urushlirini axirlashturush we b d t xewpsizlik kéngishining maqulluqi bolmastin döletlerning öz aldigha émbargo yürgüzüsh qarari chiqarmasliq layihesi qobul qilinmidi.

diplomatik menbelerdin élinghan melumatlarda körsitilishiche, amérika, yawropa ittipaqi we ukraina rusiyening layihesige naraziliq bildürgen.

b d t omumiy kéngishide wirus seweblik bélet tashlanmighanliqi üchün, layiheler yéngi belgilimilerge asasen awaz birliki bilenla qobul qilinish imkaniyitige ige.