firansiye ottura sherqqe awiyamatka yollaydighanliqini bildürdi
firansiye pirézidénti émanuél makron, firansiyening charlés dé gaullé namliq awiyamatkisining ottura sherqqe ewetilidighanliqini uqturdi.
türkiye awazi radiyosi xewiri: émanuél makron yéngi yil munasiwiti bilen dölitining orléans shehiride eskerler bilen uchrashqanda söz qilip, firansiyening charlés dé gaullé namliq awiyamatkisining aprél éyighiche chammal herbiy herikitige yéqindin yardemde bolush meqsitide ottura sherqte wezipe öteydighanliqini eskertti.
awiyamatkining yene yawropa döletliri bilen birlikte ijra qilinidighan birleshme heriketlerdimu ishlitilidighanliqini bildürgen makron, daésh térrorluq teshkilati xewpining küchiyip qalghanliqini ilgiri sürdi.
firansiyening paytexti parizhda 2015 – yili 17 – noyabirda yüz bérip 130 ademning ölümini keltürüp chiqarghan, jawabkarliqini daésh üstige alghan térrorluq hujumliridin kéyin, 24 raféyl urush ayropilani sighimchanliqigha ige charlés dé gaullé namliq awiyamatka ottura sherqqe ewetilgenidi. mezkur awiyamatka ötken yili jenubiy xitay déngizidimu wezipe ötigenidi.
firansiye, chammél herbiy herikitini 2014 – yili 19 – séntebirde iraqta bash kötürgen daésh tehditige qarshi hawa hujumliri bilen bashlighan, bu heriket kéyinche süriyediki daésh xewpige qarshi küreshnimu öz ichige alidighan shekilde kéngeytilgenidi.
