трамп сүрийәниң шәрқидә 200 әскәр қалдурушни ойлашмақта икән

түркийә авази радийоси хәвири: америка пирезиденти доналд трампниң сүрийәниң шәрқидә 200 әтрапида әскәр қалдурушни ойлишиватқанлиқи илгири сүрүлди.

америкада чиқидиған нийу йорк таймес гезитиниң йуқири дәриҗилик бир әмәлдарниң ейтқанлиридин нәқил елип елан қилған хәвиридә көрситилишичә, пирезидент трамп америка дөләт мудапиә министирлиқи (пентагон, бәш бурҗәклик бина) ниң сүрийәниң шәрқидә 200 әтрапида әскәр қалдуруш тәклип қилинған пиланини қобул қилидикән.

хәвәрдә әскәртилишичә, мәзкур пиланниң икки сәвәби бар болуп, биринчиси даешқа қарши туруш؛ иккинчиси, сүрийәниң шәрқидики нефит районлириниң бәшшар әсәд һакимийити билән русийәниң қолиға чүшүп кәтмәслики икән.

әгәр бундақ болса, сүрийәниң шималидики тәхминән 1000 әтрапидики барлиқ америка әскириниң чекинидиғанлиқини елан қилғиниға анчә узун болмиған пирезидент трамп, иккинчи «сүрийәдин әскәр чекиндүрүш» мәсилисидә кәйнигә қәдәм ташлиған болиду.

пирезидент трамп 2018-йили декабир ейида икки миң әтрапидики америка әскириниң дәрһал чекиниш қарарини билдүргән вә аридин узун өтмәйла қарарини бошаштуруп, вақитқа қарита пәйдинпәй әскәр санини азайтиш тоғрисида пәрман чүшүргән иди.

пирезидент трамп өткән һәптә елан қилған байанатида, сүрийәниң шималида туруватқан миң әтрапидики америка әскириниң чекинидиғанлиқини билдүргән. америка дөләт мудапиә министири майк есперму бу әскәрләрниң ирақниң ғәрбигә әвәтилидиғанлиқини қәйт қилған иди.

сүрийәниң әл танф районида һазирму американиң 125 әскири бар. америка дөләт мудапиә министирлиқи бу әскәрләрниң чекинмәйдиғанлиқини елан қилған иди.