б д т ниң йәмән алаһидә вәкили: йәмән парчилиниш хәвпигә дуч кәлмәктә

түркийә авази радийоси хәвири: бирләшкән дөләтләр тәшкилати (б д т) ниң йәмән алаһидә вәкили мартин грифитс, йәмәндә давамлишиватқан тоқунушларниң вәзийәтни сүрәт билән өзгәртивәткәнликини, дөләтниң бөлүнүш хәвпигә дуч кәлгәнликини ейтти.

йәмәндики өзгиришләр һәққидә б д т  хәвпсизлик кеңишигә мәлумат бәргән грифитс, сәна (сана), тәиз, әлҗәвф, әлбәйда, һәҗҗәһ вә әддалида тоқунушларниң давамлишиватқанлиқини билдүрди.

берилгән вәдиләргә қаримай, сәна айродуруминиң һазирғичә ечилмиғанлиқини, һудәйдә келишиминиң тегишлик дәриҗидә тез иҗра қилинмиғанлиқини, тәиз тоғрисида һасил қилинған келишим вә әсир алмаштуруш мәсилисидә конкрет қәдәмләрниң ташланмиғанлиқини тәкитлигән грифитс, һусийларниң сәуди әрәбистандики пуқрави ул – әслиһәләргә нишанлиқ зәрбә бериш һәрикәтлирини вә әрәб бирләшмә хәлипиликиниң қоллиши астидики җәнубтики мувәққәт кеңәшкә қарашлиқ күчләрниң әдәндики һөкүмәт биналирини қолға чүшүрүшкә урунуш қилмишлириниму әйиблиди.

у, йәмәнниң иҗтимаий қурулмисиниң бузғунчилиққа учриғанлиқиға, зораванлиқ вә тоқунушларниң дөләтниң җәнубидики башқа вилайәтләргә йамраш хәвпиниң барлиқиға ишарәт қилди вә сөзини давамлаштуруп, «йәмәнниң бөлүнүш хәвпи барғанчә күчәймәктә, шуңа тинчлиқ орнитиш хизмәтлириниң сүритиниң ашурулушиға һәрқандақ чағдикидинму бәкрәк еһтийаҗ бар. вақитни зайә қиливетишкә болмайду» дегәнләрни қәйт қилди.

б д т баш катипиниң инсаний мәсилиләргә мәсул муавинлиридин урсула муеллер болса, әдәндә һөкүмәт күчлири билән җәнуб мувәққәт кеңишигә қарашлиқ күчләр арисидики тоқунушларда кәм дегәндә 300 пуқраниң җенидин айрилғанлиқи йаки йариланғанлиқини ейтти.