америка афғанистандин әскәр чекиндүриду
америка билән талибан музакирә қиливатқан келишим лайиһәсидә, афғанистанда вәзипә өтәватқан миңларчә америка әскәрлирини чекиндүрүшниң пилан қилинғанлиқи ашкариланди.
түркийә авази радийоси хәвири: вашингтон почтиси гезитиниң америка мәсуллиридин нәқил алған хәвиридә, келишим лайиһәсигә асасән, трамп һөкүмитиниң уруш тохтитиш вә әл қаидәдин ваз кечишни өз ичигә алған талибанниң йол қойушлириға җавабән, миңларчә америка әскәрлириниң афғанистандин чекинишиниң пилан қилинғанлиқи билдүрүлди.
талибанниң афғанистан һөкүмити билән бивастә кәң даиридә тинчлиқ келишимини музакирә қилишини шәрт қилған келишим билән, афғанистандики америка әскәрлириниң санини 14 миңдин 9-8 миңға чүшүрүш тәклип қилиниду.
келишим лайиһәси рамкилириниң, американиң афғанистан алаһидә вәкили залмай халилзад билән талибан оттурисида бир қанчә ай давамлашқан музакирәләрдин кейин бекитилгәнлики вә ахирқи нусхисиниң, афғанистанда келәр ай өткүзүлидиған пирезидентлиқ сайлимидин бурун шәкиллинидиғанлиқи қәйт қилинди.
келишим лайиһәси қобул қилинған әһвалда, афғанистандики урушни ахирлаштурушта бесилидиған әң муһим қәдәмләрдин бири болидиғанлиқи билдүрүлмәктә.
нам-шәрипини ашкарилашни халимиған афғанистан һөкүмәт әмәлдарлири, келишим лайиһәсиниң америка әскәрлириниң санини азайтишни өз ичигә алидиғанлиқини, әмма қанчилик азайтилидиғанлиқи вә қачан азайтилидиғанлиқи тоғрисида мәлуматлириниң йоқлуқини билдүрди.
америка дөләт мудапиә министирлиқиниң мәлуматлирида көрситилишичә, 2001-йили афғанистанда уруш башланғандин тартип 2400 америка әскири җенидин айрилған, 20 миңдин артуқ әскәр йариланған.
