америка мексикадин %5 таможна беҗи алиду
америка һөкүмити латин америкалиқ қанунсиз көчмәнләрниң мексика арқилиқ америка қошма иштатлириға келишини тохтитиш мәқситидә, мексикадин%5 таможна беҗи елишни йолға қойди.
түркийә авази радийоси хәвири: америка пирезиденти доналд трамп мексикадин %5 таможна беҗи елиш қарарини твиттер бетидә елан қилди. у байанатида мундақ деди:
«америка 10-ийунда мексикадин импорт қилинған барлиқ мәһсулатлардин %5 таможна беҗи елишни башлайду. бу мексика арқилиқ дөлитимизгә келиватқан көчмәнләр еқими тохтиғичә давамлишиду. бу таможна беҗи қанунсиз көчмәнләр мәсилиси һәл қилинғичә пәйдин пәй ешип бариду, һәл қилинғанда әмәлдин қалдурулиду» деди.
пирезидент трамп бу һәқтә йазма байанат елан қилип, мексикаға %5 таможна беҗи елинидиғанлиқиниң сәвәблирини чүшәндүрди.
у латин америка дөләтлиридин кәлгән қанунсиз көчмәнләрни тохтитиш үчүн мексиканиң һечнимә қилмиғанлиқини илгири сүрди вә һәр ай %5 лик таможна беҗиниң өсүп маңидиғанлиқини, 1-өктәбирдә болса %25 гә чиқирилидиғанлиқини билдүрди.
у мексика қанунсиз көчмәнләр еқимини тохтатқан тәқдирдә баҗниң дәрһал әмәлдин қалдурулидиғанлиқини әскәртти.
пирезидент трамп узун вақиттин буйан қанунсиз көчмәнләр тоғрисидики етиразлирини тилға елип келиватқан болуп, у америка-мексика чеграсиға там соқушни тәләп қилған иди. йеқинқи күнләрдә болса, униң мексика һөкүмитигә қаратқан үсти йепиқ тәнқидлири көпәйгән иди.
трамп һөкүмити чаршәнбә (26-май) күни тексас иштатиниң ел павсо (El Paso) районида миң әтрапидики қанунсиз көчмәнниң тутулғанлиқиға инкас қайтуруп, бу хилдики чеградин өтүшләргә рухсәт қилинмайдиғанлиқини елан қилған иди.
