трамп: оттура шәрқ райониға 120 миң кишилик қошун әвәтишимиз йалған
америка қошма иштатлири пирезиденти доналд трамп дөлитиниң иран тәһдитигә қарши оттура шәрқ райониға 120 миң кишилик қошун әвәтишигә алақидар хәвәрләрниң йалған икәнликини ейтти.
түркийә авази радийоси хәвири: трамп «‹ New York Times › гезити» тәрипидин алдинқи күни елан қилинған «америка қошма иштатлири иран тәһдитигә қарши 120 миң кишилик қошун әвәтишкә тәййарлиниватиду» сәрләвһилик хәвириниң йалған икәнликини тәкитләп мундақ деди: «әслидә мениң шундақ қилиш нийитим бар иди, әмма биз районға 120 миң кишилик қошун әвәтиш тоғрулуқ пилан түзмидуқ, әгәр бундақ пилан түзгән болсақ, техиму көп әскәр әвәткән болаттуқ, бундақ бир пилан түзүшкә мәҗбур болуп қалмаслиқимизни үмид қилимән.»
америка қошма иштатлири пирезиденти доналд трампниң « әгәр бундақ пилан түзгән болсақ, техиму көп әскәр әвәткән болаттуқ» тәриқисдики байанати, «америка қошма иштатлириниң иран билән һәрбий тоқунушуш еһтималлиқини нәзәрдин сақит қиливәтмигәнликидин дерәк бериду» тәриқисидә анализ қилинди.
гәрчә америка қошма иштатлири пирезиденти доналд трамп «‹ New York Times › гезити» ниң хәвирини йалған дәп қариған болсиму, лекин америка қошма иштатлири дөләт мудапиә министирлиқи тәрипидин бу һәқтә техичә һечқандақ байанат елан қилинмиди.
америка қошма иштатлири пирезиденти доналд трамп алдинқи күни бу һәқтә елан қилған байанатида, иран америка қошма иштатлириға қарши һәрқандақ бир қәдәм ташлиған тәқдирдә, буниң бәдилиниң «еғир» болидиғанлиқини ейтқаниди.
