макрон сериқ җилиткиликләрниң тәләплиригә җаваб қайтурди

түркийә авази радийоси хәвири: фирансийә пирезиденти макрон сериқ җилиткиликләр намайишиниң сәвәби болған мәсилиләрни һәл қилиш вә тәләпләргә җаваб бериш үчүн мәмликәт миқйаси бойичә чақирилған «дөләт музакирәси» йиғинлиридин кейин, елсий сарийида ахбарат елан қилиш йиғини өткүзди.

у сериқ җилиткиликләр һәрикитиниң давамлишиватқанлиқини, бирақ җәмийәт тәртипини қайтидин турғузулуши керәкликини әскәртип, 2018-йили декабир ейида сериқ җилиткиликләрниң тәләплиригә мунасивәтлик бәзи тәртипләрниң орнитилғанлиқини хатириләтти.

у дөләт ичидә йеқинқи икки йилда елип берилған ислаһатларни тоғра дәп қарайдиғанлиқини вә давамлаштуруш керәкликини тәкитләп: «сериқ җилиткиликләр һәрикити чоңқур болған адаләтсизлик туйғусини ипадиләйду» деди.

у дөләттә реферандумни мәҗбурий һалға кәлтүрүшкә мунасивәтлик бир тәләпниң барлиқини, әмма буни тоғра дәп қаримайдиғанлиқини вә буниң һазирқи мәсилиләрни һәл қилалмайдиғанлиқини билдүрди.

у хәлқниң реферандум өткүзүши үчүн керәклик имза шәртиниң 4.5 милйондин 1 милйонға чүшүрүлидиғанлиқини, 2022-йилиғичә шәһәр башлиқлириниң тәстиқи болмай туруп, шәһәрләрдики мәктәп вә дохтурханиларниң тақалмайдиғанлиқини қәйт қилди.

у ишләйдиған пуқраларниң тапшуруши керәк болған кирим беҗиниң төвәнлитилидиғанлиқини, ширкәтләр тапшуруши керәк болған бәзи баҗларниңму әмәлдин қалдурулидиғанлиқини вә дөләт органлири хираҗәтлириниң төвәнлитилидиғанлиқини билдүрди. у оқуғучиларға техиму сүпәтлик маарип тәрбийәси бериш үчүн бир қанчә йил ичидә йәсли вә башланғуч мәктәпләрдики синипларда оқуғучилар саниниң 24 тин ашурулмайдиғанлиқини елан қилди.

у мааши 2 миң йавродин төвән пенсийонирлар маашиниң, 2019-йили 1-йанвардин һесаблап өстүрүлидиғанлиқини билдүрди. у пенсийонирлиқ системисиниң техиму адил болуши вә пенсийонирлиқ маашиниң әң аз дегәндә, миң йавро болуши керәкликини тәкитләп, килимат өзгиришигә қарши күрәшниң, фирансийә вә йавропаниң йүрикидин орун елиши керәкликини қәйт қилди.

у дөләтниң көчмәнләр сийаситини қайтидин көздин кәчүрүшиниң муһимлиқини алаһидә әскәртип, йавропаниңму мәзкур мәсилидә өзара һәмкарлиқларни күчәйтиши вә бу рамкида шәнгән райониға мунасивәтлик йеңи хизмәтләрни қилиш керәкликини тәкитлиди.

у панаһлиқ тиләш үчүн бәлгиләнгән шәртләргә игә кишиләрниң қобул қилинишиниму алаһидә әскәртти. у һәр йили дөләтниң көчмәнләр сийаситигә мунасивәтлик парламентта бир йиғин ечилидиғанлиқини, панаһлиқ тиләш һоқуқини сүйиистемал қилғанларға зәрбә бериш керәкликини қәйт қилди.

у һазирчә һечқандақ мәсилидә реферандум өткүзүшни ойлимиғанлиқлирини, бирақ зөрүр болғанда өткүзүлидиғанлиқини билдүрди.

у бир мухбирниң, «2022-йили өткүзүлидиған пирезидентлиқ сайлимида намзат болидиған йаки болмайдиғанлиқи» һәққидики соалиға: «алдимиздики сайлам хийалимда йоқ. вәзипәмни мувәппәқийәтлик һалда ахирлаштурушни үмид қилимән, дөлитимниң мувәппәқийәт қазинишини үмид қилимән, чүнки уни һәммидин бәк йахши көримән. бүгүнкиси мән арзу қилған сәвийә әмәс, бәш йил бурунқисиму мән арзу қилған сәвийә әмәс иди» дәп җаваб бәрди.

у парламент әзалири вә кеңәш әзалири саниниң %30-25 әтрапида азайтилидиғанлиқини, парламентта барлиқ партийәләрниң тәңпуң нисбәттә вәкиллик қилинидиғанлиқини қәйт қилди. у 15-апрел (дүшәнбә) елан қилишни пилан қилған байанатини, нотредәм катедрали (Notre Dame Katedral) ға от кетиши сәвәбидин әмәлдин қалдурған иди. мәмликәт миқйаси бойичә чақирилған «дөләт музакирәси» йиғинлири үч ай давам қилған иди.

йеқилғу баһасиниң өсүши вә начар иқтисадий шараитларға наразилиқ билдүрүп башланған вә кейинчә макрон һөкүмитигә қарши намайишларға айлинип кәткән «сериқ җилиткиликләр» намайиши, 2018-йили 17-нойабирдин тартип та һазирғичә давамлишип кәлмәктә.

һөкүмәт елан қилған мәлуматларға асасланғанда, бүгүнгичә намайишларда 11 киши җенидин айрилған, 2 миңдин артуқ киши йариланған. 8400 дин артуқ киши тутулған болуп, миңға йеқин намайишчи қамақ җазасиға һөкүм қилинған.