نىگېرىيە ۋە كامېرۇن ئارمىيەلىرى نۇرغۇن تېررورچىنى بىر تەرەپ قىلدى

تۈركىيە ئاۋازى رادىيوسى خەۋىرى: نىگېرىيە ئارمىيەسى بورنو ۋىلايىتىدە بوكو ھارام تېررورلۇق تەشكىلاتىغا قارشى كەڭ كۆلەملىك ھەربىي ھەرىكەت قوزغاپ 27 تېررورچىنى ئۆلتۈردى.

نىگېرىيە ئارمىيەسى باياناتچىسى مۇسا ساگىر،  نىگېرىيە ۋە كامېرۇن ئارمىيەسىنىڭ ھەمكارلىشىپ بورنو ۋىلايىتىگە قاراشلىق ۋۇلگو، تۇمبۇما، چىكۇن گۇدۇ ۋە بۇكار ماريام يېزىلىرىدا بوكو ھارام تەشكىلاتىغا كەڭ كۆلەملىك ھەربىي ھەرىكەت قوزغىغانلىقىنى ئۇقتۇردى.

ھەربىي ھەرىكەتلەردە 27 تېررورچىنىڭ ئۆلتۈرۈلگەنلىكىنى ئېيتقان ساگىر، تەشكىلاتقا تەۋە نۇرغۇن قورال-ياراغنىڭ قولغا چۈشۈرۈلگەنلىكىنى بىلدۈردى.

ساگىر: نىگېرىيە ۋە كامېرۇن ئارمىيەلىرىدىن ئۆلگەن ياكى يارىلانغان ئەسكەر يوق، دېدى.

نىگېرىيەدە 2000-يىللاردا باش كۆتۈرگەن تېررورلۇق تەشكىلاتى بوكو ھارام، 2009-يىلدىن بۇيان كەڭ كۆلەملىك تېررورلۇق قىلمىشلىرى سادىر قىلىپ 20مىڭدىن ئارتۇق ئادەمنىڭ جېنىغا زامىن بولدى.