әнглийә исраилийәни әйиблиди
әнглийә, исраилийәниң ишғал астидики ғәрбий қирғақта йеңи йәһудий олтурақ районлирини тәсис қилиш қарарини әйиблиди.
түркийә авази радийоси хәвири: әнглийәниң оттура шәрқкә мәсул дөләт ишлири вәзири марк фиелд йазма байанат елан қилип, дөлитиниң исраилийә даирилириниң техиму көп йәһудий олтурақ районлирини тәсис қилиш пиланлирини күчлүк шәкилдә әйибләйдиғанлиқини билдүрди.
йәһудий олтурақ районлириниң хәлқара қанунға асасән қанунсиз икәнликини вә икки дөләтлик һәл қилиш чарилиригә зийан йәткүзидиғанлиқини билдүргән фиелд, исраилийәни зийан йәткүзгүчи һәрикәтләрни тохтитишқа чақирди.
у йәнә, барлиқ тәрәпләрдин мәвҗут сүркилишләрни азайтип, адил вә үзүл – кесил тинчлиқ орнитиш йолида техиму күчлүк тиришчанлиқ көрситишкә чақирди.
исраилийә баш министири бунйамин нетанйаһу 9 – апрелдики сайламда ғәлибә қилип, қайтидин баш министир болған тәқдирдә, ишғал астидики ғәрбий қирғақтики қанунсиз йәһудий олтурақ районлирини «қошувалидиғанлиқи»ни ейтқан вә йеңи йәһудий олтурақ районлирини тәсис қилидиғанлиқини уқтурғаниди.
исраилийә 1967 – йилидин буйан ишғал қилип туруватқан ғәрбий қирғақта 250 кә йеқин қанунсиз йәһудий олтурақ райони бар болуп, бу йәрләрдә 400 миңдин артуқ йәһудий көчмән йашимақта.
хәлқара қанун бойичә, ишғал астидики земинлардики барлиқ йәһудий аһалиләр районлири қанунсиз һесаблиниду.
